Qeveria ka depozituar në Kuvend ndryshime për ligjin e të huajve që pritet të lehtësojnë veçanërisht regjimin e punësimit dhe qëndrimit në vendin tonë.
Tri kategori të reja do të njihen ligjërisht për t’u pajisur me leje qëndrimi: investitorët, të vetëpunësuarit dhe punëtorët e shtëpisë.
Të huajt pajisen me leje qëndrimi si investitor, për herë të parë me një afat kohor dyvjeçar kur bën një investim në Republikën e Shqipërisë; për çdo person të huaj ka të punësuar pesë shtetas shqiptarë dhe ky raport të ruhet edhe në bordin drejtues; paga e tyre të paktën sa mesatarja e pagës së paguar në Shqipëri për këto poste të vitit pararendës; subjekti të zotërojë dokumente të rregullta, me të cilat të provojë se aktiviteti i tij nuk është me humbje, si dhe dokumente të rregullta të regjistrimit dhe shlyerjes së detyrimeve në organet tatimore. Sipas propozimit, leja e qëndrimit si investitor ripërtërihet me afat kohor trevjeçar, nëse nuk kanë ndryshuar kushtet për të cilat është dhënë leja e mëparshme.
Leja unike për të huajt
Aktualisht, një nga tipet e lejeve unike është “Kartë blu AL”, e ripërtëritshme, e cila lëshohet me afat të përcaktuar vetëm për punonjës me kualifikim të lartë dhe i jep të drejtën mbajtësit të hyjë, të qëndrojë dhe të dalë në/nga Republika e Shqipërisë brenda afateve të përcaktuara në të.
Me ndryshimet e propozuara lehtësohet dhënia e kësaj leje nëse në kontratën e punës përcaktohet se paga mesatare vjetore bruto është minimalisht sa paga mesatare vjetore bruto kombëtare.
Leja unike për të huajin lëshohet duke mbajtur parasysh zhvillimet dhe nevojat e tregut të punës në Republikën e Shqipërisë, thuhet në projekligj. Kërkesa për leje unike bëhet on-line dhe shqyrtohet nga AKPA-ja dhe autoriteti vendor për kufirin dhe migracionin.
Kategoritë, që përjashtohen nga detyrimi për të marrë miratimin e AKPA-s janë anëtari i familjes i një shtetasi të huaj me qëndrim të ligjshëm në Republikën e Shqipërisë; studentët; të huajt që përjashtohen nga miratimi për punësim; au pairs; të huajt me statusin e viktimës së mundshme apo viktimës së trafikimit; refugjatët; i huaji me mbrojtje të përkohshme; si dhe i huaji me statusin e mbrojtjes plotësuese.
Në dispozitën kalimtare parashikohet se i huaji, të cilit i është lëshuar leje qëndrimi ose leje unike afati i së cilës përfundon pas hyrjes në fuqi të ndryshimeve të këtij ligji, nëse kushtet për të cilat është dhënë kjo leje mbeten të njëjta, vazhdon të përdorë dokumentin e dhënë, pavarësisht se ky ligj përcakton emërtim të ndryshëm të dokumentit./ekofin.al
