Si e vranë uzinën e përpunimit të naftës ARMO , mbi këtë tokë ku përpunohej nafta po ndërtohet park fotovoltaik, kurse uzina u shkri për skrap
Rafineria e famshme e përpunimit të naftës në Ballsh tashmë i përket historisë, pasi siç konstatohet edhe prej fotove nga ajri, atje tashmë nuk ka mbetur qoftë edhe një copë hepur.
Gjithçka është çmontuar prej muajsh dhe është shitur për skrap, ndërkohë që siç mëson Skyweb.al tani në atë tokë është duke u ndërtuar një park për prodhimin e energjisë elektrike me panele diellore, investim i kompanisë Infotelecom-Albsolar 3 në pronësi të biznesmenëve Marin Gjonaj dhe Agron Haxhiymeri.
ARMO kaloi duar më duar nga shqiptarët te kinezët dhe më pas në pronësi të bankave Raiffeisen dhe Credins Bank për shkak të mosshlyerjes së detyrimeve të kredisë, ndërkohë që në fund dhjetëra hektarë tokë iu dhanë për një çmim qesharak kompanisë Infotelecom-Albsolar 3.
Infotelecom-Albsolar 3 është një shoqëri e cila zotërohet nga dy biznesmenë. Marin Gjonaj zotëron 51 për qind të aksioneve të saj përmes holding-ut të tij Gjonaj Group, ndërsa pjesa tjetër prej 49 për qind zotërohen nga biznesmeni Agron Haxhiymeri, i cili siç konstaton Skyweb.al u thirr të bëhej pjesë e kompanisë pikërisht në momentin që banka nisi procedurat e shitjes së kësaj prone.
Kalimi duar më duar
Pasi shtiu në dorë asetet e ARMO-s kompania Shijaku nisi menjëherë çmontimin e Uzinës dhe shitjen e saj për skrap. Më vonë Shijaku themeloi kompaninë GreeNNat, të cilës i kaloi si aset të gjithë tokën e ish-Uzinës.
Në janar të vitit 2023 qeveria miratoi vendimin për ndërtimin e një parku fotovoltaik nga shoqëria GreeNNat, në zonën ku ka qenë rafineria e Ballshit.
Dhënia e së drejtës për ndërtimin e centralit u bë pa garë, ndërsa në vendim u saktësua se ndërtimi i centralit të ri “nuk është objekt koncensioni” dhe nuk përfiton nga masat mbështetëse.
Sipas vendimit, afati i pritshëm i vënies në punë dhe pajisja me leje ndërtimi u caktua brenda 60 muajve nga hyrja në fuqi e vendimit, ndërsa afati i operimit të centralit është dhënë për 49 vite, raportonte në atë kohë Kapitali.
Qeveria ka parashikuar që e drejta për ndërtimin e burimit gjenerues të energjisë elektrike fotovoltaike “mund të transferohet te një subjekt i tretë” si dhe caktoi Ministrinë e Infrastrukturës dhe Energjisë si përgjegjëse për lidhjen e kontratës dhe për zbatimin e saj.
Sipas parashikimit të VKM-së, shteti do të përfitojë “falas, në formë royalty sasinë e energjisë elektrike, në masën 2% të sasisë vjetore të prodhimit të energjisë elektrike ose konvertimin e saj në vlerë monetare”.
Me sa duket, Shijaku nuk preferoi ta ndërtonte vetë centralin diellor duke vendosur që ta shesë kompaninë se bashku me liçencën e parkut fotovoltaik për 1.95 milionë euro tek Infotelecom-Albsolar 3.
Blerësit e rinj, biznesmenët Gjonaj dhe Haxhiymeri po vijojnë tashmë investimin mbi tokën e ARMO-s së abuzuar dhe zhvatur për dekada, nga biznesmenë të ndryshëm me shtetin në krye. /skyweb.al
