Drejtoria e Përgjithshme e Tatimeve ka njoftuar se që prej 15 korrikut, njoftimet dhe kërkesat për pagesën e detyrimeve tatimore dërgohen vetëm përmes platformës elektronike e-Filing, duke hequr dorë nga dërgimi fizik me postë.
Çdo dokument lidhur me borxhet tatimore të papaguara, qoftë nga vetëdeklarimet apo aktet e kontrollit dhe vlerësimit të administrates do të gjenerohet automatikisht në llogarinë elektronike të tatimpaguesit, nën seksionin “Dokumentet e mia”. Dokumentet do të jenë të pajisura me vulë elektronike të Drejtorisë Rajonale të Borxhit dhe do të kenë vlerë të plotë ligjore.
Administrata Tatimore thekson se ky ndryshim synon të përmirësojë transparencën dhe efikasitetin në komunikimin me bizneset, duke siguruar informim në kohë reale për detyrimet tatimore dhe duke inkurajuar shlyerjen e menjëhershme të borxheve. /Skyweb.al
