Sezoni i dhuratave është rikthyer dhe bashkë me të edhe kërkimi i pafund për gjetjen e surprizave të duhura për Krishtlindje. Për disa, shëtitja nëpër dyqane është pjesë e kënaqësisë. Për shumë të tjerë, është një detyrim i lodhshëm. Ndaj një numër gjithnjë e më i madh konsumatorësh po ia delegon këtë proces inteligjencës artificiale.
Chatbotët po shndërrohen në blerës personalë për të gjithë. Ata dëgjojnë kërkesat, hartojnë lista të shkurtra produktesh dhe ndihmojnë në krahasime.
Sipas një ankete të Shopify, rreth dy të tretat e konsumatorëve në vendet e zhvilluara, dhe pesë të gjashtat e moshës 18 deri 24 vjeç – planifikojnë të përdorin AI për blerjet e festave këtë vit.
Studimi i McKinsey tregon se këshillimi për blerje është përdorimi i dytë më i zakonshëm i AI gjenerative në SHBA, pas kërkimit të përgjithshëm dhe përpara asistencës në shkrim.
Në shumë raste, blerjet mund të kryhen direkt përmes chatbot-it, pa kaluar fare te faqet tradicionale të e-commerce.
Sipas parashikimeve të McKinsey, deri në vitin 2030 nga 3 deri në 5 trilionë dollarë blerje globale do të realizohen përmes këtyre “agjentëve” të automatizuar.
Industria e shitjes me pakicë po hyn kështu në fazën e saj të radhës të transformimit, ku inteligjenca artificiale po bëhet hallka kryesore që lidh konsumatorin me produktin. /The Economist
