Sektori i turizmit ka vijuar trendin pozitiv edhe gjatë muajit tetor, duke shënuar rritje të ndjeshme si në vizitorë ashtu edhe në netë qëndrimi. Sipas INSTAT, numri total i vizitorëve u rrit me 39.1% krahasuar me tetorin e një viti më parë, duke konfirmuar që sezoni turistik po zgjatet gradualisht përtej muajve klasikë të verës.
Rritja më e madhe vjen nga vizitorët jo rezidentë, të cilët janë rritur me 55.4%. Turistët e huaj jo vetëm që kanë ardhur më shumë, por edhe kanë zgjedhur të qëndrojnë më gjatë. Netë qëndrimet e tyre u rritën me 26%, ndërsa totali i netë qëndrimeve në vend u zgjerua me 17.4%. Ndërkohë, vizitorët vendas patën rritje më të butë, me 5.8%, por netë qëndrimet e tyre ranë me 3.1%, duke reflektuar një ritëm më të qetë të kërkesës së brendshme.
Zonat bregdetare mbeten motori kryesor i rritjes, me një zgjerim prej 73.6% të vizitorëve në krahasim vjetor. Akomodimet alternative – si bujtinat, shtëpitë turistike dhe struktura të tjera jo tradicionale – shënuan rritje të fortë prej 54.4%, duke treguar diversifikimin e ofertës turistike dhe kalimin drejt modeleve më fleksibël të akomodimit.
Sa i përket origjinës së turistëve të huaj, Kosova vijon të kryesojë me 14% të totalit të ardhjeve në tetor. Italia dhe Gjermania pasojnë me nga 13% secila, ndërsa Franca dhe Mbretëria e Bashkuar përbëjnë 7% dhe 5%. Pothuaj gjysma e vizitorëve të tjerë – rreth 48% – vijnë nga tregje të ndryshme, duke treguar një shtrirje gjithnjë e më të gjerë të interesit ndërkombëtar për Shqipërinë.
Një tjetër tregues pozitiv është edhe norma e shfrytëzimit të dhomave, e cila arriti në 31.6%, nga 27.7% që ishte një vit më parë. Kjo tregon se jo vetëm ka më shumë vizitorë, por dhe struktura akomoduese po arrijnë rezultate më të mira operacionale.
Tetor i 2025 konfirmon se turizmi mbetet një ndër sektorët me rritjen më të qëndrueshme, duke ndikuar drejtpërdrejt në ekonominë lokale dhe atë kombëtare. /skyweb.al
