Kryeministri Edi Rama mori pjesë në prezantimin e programit për konkursin ndërkombëtar të Qendrës së Drejtësisë, ku deklaroi se projekti përfaqëson financimin më të madh të realizuar ndonjëherë për infrastrukturën administrative në Shqipëri.
Sipas tij, ndryshe nga projekte të tjera që mund të përfshihen në skema të ndryshme financimi, Qendra e re e Drejtësisë do të mbështetet drejtpërdrejt nga buxheti i shtetit. Rama theksoi se, megjithëse bëhet fjalë për një investim me kosto të lartë, ai është i domosdoshëm në këtë fazë të zhvillimit të sistemit të drejtësisë, pas reformës së thellë të ndërmarrë në vitet e fundit.
Kreu i qeverisë u shpreh se tashmë janë krijuar kushtet për të përmbushur një sërë arsyesh që justifikojnë këtë investim, duke nënvizuar se pas reformës rrënjësore në drejtësi, secila palë duhet të përmbushë përgjegjësitë e veta. Ai kërkoi që institucionet e sistemit të drejtësisë të bëjnë detyrat e tyre, ndërsa qeveria do të vijojë të mbështesë sistemin me qëllim përmirësimin e kushteve dhe standardeve të funksionimit.
Rama pranoi se aktualisht gjykatësit dhe prokurorët punojnë në kushte jo optimale dhe se sistemi mbetet prapa në aspektin teknologjik. Ai theksoi se një nga sfidat kryesore ka qenë fragmentarizimi i sistemeve teknologjike, ku çdo institucion ndërtonte module dhe platforma të veçanta, pa ndërveprim mes tyre.
Sipas tij, kjo qasje kishte sjellë shpenzime të konsiderueshme, por me rezultate të dobëta, duke krijuar një sistem të ndarë në struktura që nuk komunikonin me njëra tjetrën. Kryeministri shtoi se zgjidhja ka qenë ndërtimi i një rrjeti profesionistësh me formimin e duhur, të cilët funksionojnë si një tërësi për të zhvilluar teknologjinë brenda institucioneve dhe për të garantuar integrim më të mirë të sistemeve.
Qendra e re e Drejtësisë synon të krijojë një infrastrukturë moderne dhe të unifikuar për institucionet e sistemit, në përputhje me standardet më të larta funksionale dhe teknologjike. /skyweb.al
