Grupi i famshëm i hakerëve “Stormous” deklaroi sipas TechNadu, një faqe e njohur për raportimin e sulmeve kibernetike, se ka sulmuar sistemet e kompanisë Wizz Air, duke njoftuar se ka rrëmbyer rreth 22 GB të dhëna të ndjeshme që përfshijnë informacione të kompanisë, punonjësve dhe klientëve.
Përmes kanaleve të tyre online, Stormous publikoi disa mostra të materialeve të vjedhura, të cilat përfshijnë raporte të brendshme të kompanisë, dokumente operacionale, certifikata të operatorëve ajrorë për punonjësit dhe palët e tjera të lidhura me operacionet e tyre.
Në përmbajtjen e publikuar përfshihen gjithashtu të dhëna personale të stafit dhe klientëve të linjës ajrore.
Në lidhje me këtë sulm ka reaguar edhe drejtuesi i agjencisë turistike Julian Hima, i cili thekson se të gjithë ata që kanë llogari në aplikacioin e Wizz Air duhet të shohin nëse kanë lëvizje në llogari.
Wizz Air u kontaktua para publikimit të lajmit përmes përfaqësuesve në Shqipëri, por fillimisht zgjodhën të mos komentojnë duke mohuar dijeninë mbi sulmin.
Në një e-mail të dytë, kompania mohoi sulmin, teksa më herët kishin kërkuar fshirjen e lajmit përmes kërcënimit me padi.
“Wizz Air ka sisteme të fuqishme sigurie, të projektuarapër të mbrojtur të dhënat sensitive të klientëve dhe partnerëve të saj të çmuar. Linja ajrore konfirmon se nuk është konstatuar asnjë shkelje në lidhje me këto informacione, dhe sistemet e saj mbeten të paprekura dhe të sigurta“, tha kompania për Skyweb.
Stormous është një grup hakerësh i njohur për sulme të profilit të lartë dhe ka qenë më herët i lidhur me incidente të tjera të ngjashme në sektorë të ndryshëm.
REAGIMI I PLOTË I WIZZ AIR:
Wizz Air ka sisteme të fuqishme sigurie, të projektuarapër të mbrojtur të dhënat sensitive të klientëve dhe partnerëve të saj të çmuar. Linja ajrore konfirmon se nuk është konstatuar asnjë shkelje në lidhje me këto informacione, dhe sistemet e saj mbeten të paprekura dhe të sigurta.“
/skyweb.al
