Në një kohë kur industria e aviacionit kërkon më shumë efikasitet, më pak ndotje dhe një përvojë më cilësore për pasagjerët, Airbus A220 ka hyrë në skenë si një yll i vërtetë i qiellit. Ky avion, i njohur fillimisht si Bombardier C-Series, është përqafuar me entuziazëm nga shumë kompani ajrore dhe sot konsiderohet si një nga modelet më të avancuara dhe më të dashura në kategorinë e avionëve me “trup të ngushtë“.
Ajo që e veçon Airbus A220 është fakti se është ndërtuar nga e para për shekullin XXI. Ndryshe nga shumë avionë të tjerë që janë variante të modeleve të mëparshme, A220 është projektuar rishtazi në çdo detaj, që nga aerodinamika e deri te përvoja e pasagjerëve. Trupi i tij është ndërtuar me materiale të lehta por të qëndrueshme, ndërsa krahët kanë një formë aerodinamike që lejon një konsum shumë më të ulët karburanti. Kjo përkthehet në një ulje me 20-25% të kostos për karburant krahasuar me avionët e brezit të kaluar, si Embraer E190 apo Boeing 717.
Ajo që e bën vërtet të dallueshëm këtë avion për pasagjerët është niveli i rehatshme që ofron, diçka që shpesh mungon në avionët më të vegjël rajonalë. Kabina e A220 është më e qetë, me izolim të përmirësuar ndaj zhurmave, ndërsa dritaret janë më të mëdha, duke i dhënë fluturimit një ndjesi më të hapur dhe më të ndriçuar natyralisht. Sediljet janë më të gjera se ato të çdo avioni tjetër në këtë kategori, dhe sistemi i ndriçimit është projektuar për të qenë relaksues dhe adaptiv, duke ndihmuar në reduktimin e lodhjes gjatë fluturimeve.
Një tjetër avantazh i madh i Airbus A220 qëndron te motorët e tij. Ai përdor motorët Pratt & Whitney PW1500G, të cilët janë ndër më të avancuarit në botë për efikasitet dhe nivel të ulët ndotjeje. Këta motorë janë më të qetë dhe më ekonomikë, duke ndihmuar jo vetëm kompanitë ajrore në uljen e kostove, por edhe mjedisin në reduktimin e ndotjes akustike dhe emetimeve të CO2.
Edhe pse A220 është projektuar si një avion rajonal, ai ka aftësinë të përshkojë distanca deri në 6 orë pa ndalesë. Kjo e bën atë ideal për linja më të gjata me më pak pasagjerë, si për shembull Tiranë–Helsinki ose Romë–Riyadh, itinerare që nuk justifikojnë përdorimin e avionëve të mëdhenj, por që A220 i përballon pa vështirësi.
Nuk është rastësi që ky avion është bërë zgjedhje e preferuar për shumë kompani ajrore në Europë dhe më gjerë. Swiss, Air France, Delta, JetBlue, AirBaltic dhe së fundmi edhe Croatia Airlines kanë vendosur ta kenë A220 si bosht të flotës së tyre, raporton skyweb.al.
Arsyet janë të qarta: kosto më të ulëta operimi, përvojë më të mirë për pasagjerët dhe mundësi fleksibël për të mbuluar destinacione të ndryshme me efikasitet të lartë.
Airbus A220 nuk është thjesht një avion. Ai përfaqëson një qasje të re ndaj fluturimit, një përzierje perfekte mes teknologjisë moderne, komoditetit dhe qëndrueshmërisë ekologjike.
Është një avion që fluturon me lehtësi, operon me efikasitet dhe ofron një përvojë që e bën çdo udhëtim më të këndshëm.
Nëse në biletën tuaj lexoni “Airbus A220”, përgatituni për një fluturim ndryshe, një fluturim të zgjuar. Kompanitë që fluturojnë nga Tirana ose anasjelltas dhe që përdorin A220 janë AirBaltic; SwissAir dhe Croatia Airlines./skyweb.al
