Të gjitha pallatet dhe komplekset në të gjithë bashkitë e vendit do të kenë së shpejti administrator të detyrueshëm, i cili do të zgjidhet nga vetë pronarët e apartamenteve.
Kjo parashikohet në një ligj të ri që po përgatitet nga Ministria e Pushtetit Vendor dhe që synon të zgjidhë problematikat e shumta që lidhen me bashkëpronësinë, sigurinë dhe mirëmbajtjen e ambienteve të përbashkëta.
Sipas këtij ligji, administratori do të shërbejë si ndërmjetës mes banorëve për çështje të përbashkëta, si pastrimi dhe higjiena, siguria e ndërtesave, mbrojtja kundër zjarrit, si edhe instalimi dhe mirëmbajtja e ashensorëve. Tarifa për shërbimin e administrimit do të jetë e detyrueshme për çdo apartament, i banuar ose jo.
Ministri i Pushtetit Vendor ka sqaruar se banorët do të kenë të drejtë të zgjedhin vetë administratorin dhe të vendosin për nivelin e tarifës mujore. Por, nëse nuk bien dakord, bashkia do të caktojë një administrator automatikisht.
Zbatimi i ligjit do të bëhet me faza:
- Brenda 12 muajve nga hyrja në fuqi për ndërtesat në qytetet me mbi 10.000 banorë;
- Brenda 16 muajve për ndërtesat në komplekse banimi;
- Brenda 24 muajve për të gjitha ndërtesat e tjera në vend.
Kjo nismë vjen në një kohë kur problemet e bashkëjetesës dhe mungesa e mirëmbajtjes në pallate janë kthyer në shqetësim të përhershëm për banorët, ndërsa autoritetet synojnë që përmes këtij rregullimi të sjellin më shumë përgjegjësi dhe standarde në jetesën kolektive urbane./skyweb.al
