Aeroporti Ndërkombëtar i Tiranës ka vijuar rritjen e vrullshme të trafikut ajror, duke regjistruar një tjetër rekord për muajin maj 2025. Sipas të dhënave zyrtare, gjatë këtij muaji janë pritur 999,688 pasagjerë dhe janë realizuar 6,170 fluturime drejt 84 destinacioneve në 24 shtete të ndryshme.
Muaji maj shënoi gjithashtu rikthimin e disa destinacioneve të preferuara, duke zgjeruar më tej ofertën për pasagjerët shqiptarë dhe të huaj. Kjo rritje është një tregues i qartë i rikuperimit dhe zgjerimit të kapaciteteve të udhëtimeve ajrore në Shqipëri.
Sipas Aeroportit, pesë destinacionet më të kërkuara gjatë majit ishin: Milano, Londra, Roma, Bolonja dhe Venecia – qytete që mbeten nyje të rëndësishme udhëtimi për shqiptarët që jetojnë jashtë vendit, për turizëm dhe për lidhjet ekonomike.
TIA nënvizon se trendi i rritjes së numrit të udhëtarëve vijon në mënyrë të qëndrueshme, ndërsa falënderon të gjithë pasagjerët për besimin dhe zgjedhjen që bëjnë çdo ditë për të udhëtuar nga Shqipëria.
