Data 31 korrik shënoi afatin e fundit për dorëzimin e bilanceve nga bizneset në vend, të cilat më pas publikohen nga Qendra Kombëtare e Biznesit (QKB). Sipas të dhënave zyrtare, mbi 90% e bizneseve e përmbushën këtë detyrim ligjor në kohë, ndërsa pjesa tjetër mbeti jashtë afatit.
Nga rreth 31 mijë biznese që dorëzuan bilancet në afat, përllogaritet se rreth 3 400 nuk e realizuan këtë proces brenda kohës së përcaktuar.
Burime të Skyweb.al bëjnë me dije se shkaku kryesor lidhet me problemet teknike të sistemit, vonesat dhe ngecjet nga mbingarkesa në ditët e fundit të afatit.
Sipas QKB-së, dorëzimi i 31 mijë bilanceve përbën një nga performancat më të mira të viteve të fundit, duke tejkaluar shifrat e mëparshme: në vitin 2024 u dorëzuan në afat 28 200 bilance, në vitin 2023 ishin 26 000, ndërsa në vitin 2022 u regjistruan 20 700 bilance.
“Ky progres pasqyron një ndërgjegjësim më të madh të bizneseve për detyrimet ligjore dhe përdorimin në rritje të shërbimeve online të QKB-së”, thekson institucioni. Por, përvoja e këtij viti tregoi se nuk mjafton ndërgjegjësimi i bizneseve, por edhe funksionimi i pandërprerë i sistemit është vendimtar për respektimin e afateve.
Gjatë një verifikimi të rastësishëm në kuadër të një investigimi mbi një sektor të caktuar, të furnizuar ndjeshëm me fonde publike në vitet e fundit, Skyweb.al konstatoi se ndër bizneset që nuk kanë dorëzuar bilancin figuron edhe një kompani e një biznesmeni, aktualisht nën hetim nga SPAK.
Nga të dhënat e siguruara nga QKB dhe sipas një burimi pranë Administratës Tatimore, dyshohet se në këtë rast bëhet fjalë për një mosdorëzim të qëllimshëm. Më tej, një burim foli edhe indicie se segmente brenda administratës tatimore kanë bashkëpunuar për të fshehur mungesën e bilancit përmes ndërhyrjeve në sistem, me qëllim kamuflimin e situatës.
Skyweb.al po vijon verifikimet mbi këtë rast, i cili, nëse vërtetohen dyshimet për ndërhyrje të nëpunësve publikë për të devijuar hetimet e SPAK, mund të përbëjë një skandal të rëndë dhe një vepër penale të dënueshme./skyweb.al
