Duke analizuar raportin mes të ardhurave nga primet si edhe dëmshpërblimet e paguara e paguara nga kompanitë e sigurimeve për segmentin e sigurimit motorit, Skyweb.al ngriti shqetësimin disa ditë më parë në lidhje me këtë treg duke kërkuar edhe vëmendjen e Autoritetit të Mbikëqyrjes Financiare.
MTPL, është një segment që prek një numër të madh qytetarësh, të cilët janë njëkohësisht edhe drejtues automjetesh duke e bërë këtë një realitet më të prekshëm për qytetarët.
Pavarësisht se kompanitë dhe AMF nuk i dhanë një përgjigje direkte shqetësimeve të ngritura prej nesh, një burim pranë tregut të sigurimeve i shpjegoi Skyweb.al mënyrën se si funksionon ky treg duke shpjeguar edhe disa prej pikëpyetjeve të ngritura prej nesh.
Sipas tij, “të ardhurat rriten shpesh si zgjerim tregu dhe jo nga rritja e çmimit për njësi. Në rastin konkret, shtimi i mbi 100 mijë makinave të reja të regjistruara, kryesisht për turizëm dhe makina me qira, ka sjellë më shumë prime, por jo domosdoshmërisht më shumë dëme, pasi këto mjete drejtohen shpesh nga persona të huaj ose me përvojë drejtimi në Perëndim, çka ka shtuar kujdes më të lartë në drejtim.”
Burimi e shpjegon me një shembull: “Po ta shpjegoj me një shembull të thjesht: Kasierja e teatrit arkëtoi 150X nga 100X. Kjo nuk do të thotë se është rritur çmimi i biletave nga 1X në 1.5X. Kjo do të thotë se 50 veta më tepër kanë frekuentuar teatrin këtë herë. Mirëpo fakti që janë arkëtuar 150X nga 100X, nuk nënkupton se duhen rritur të ardhurat edhe te kafeneja e teatrit. Kafeneja e teatrit lidhet me dëshirën e frekuentuesve të teatrit për ta frekuentuar atë kafene. Janë të lidhura me frekuentimin e teatrit, zakonisht ecin bashkë, por jo domosdoshmërisht njëra sjell tjetrën. Në këtë kuptim, shkaku i pagesave të dëmeve është ndodhia e dëmeve dhe jo rritja e të ardhurave si zgjerim tregu. Zakonisht ecin bashkë, por nëse nuk ndodh kështu, nuk domethënë se po abuzohet.”
Ai thekson se kontratat e sigurimit mund të lidhen në çdo moment të vitit, çka ndikon në interpretimin e të dhënave gjashtëmujore: “Nëse raporti 6-mujor përfshin periudhën nga 1 janari deri më 30 qershor, teorikisht mund të ndodhë, në kushte krejtësisht teorike, që 100% e kontratave të sigurimit të jenë lidhur në qershor… A është kjo abuzive? Kurrsesi. Kjo mundësi teorike na fton të reflektojmë po ashtu se tendenca rritëse e njërës anë, me tendencën rënëse të anës tjetër, pagesës së dëmeve, nuk nënkupton abuzim.”
Për një panoramë më të saktë, sipas tij duhet analizuar treguesi Combined Ratio: “Combined ratio, është treguesi që përfshin shpenzimet e një kompanie për ta trajtuar dëmin, shpenzimet operacionale dhe administrative në raport me dëmet. Nëse përqindja e një kompanie mbi 90% combined ratio, që do të thotë tërësisht brenda standardeve dhe normave të kompanive me stabilitet dhe garanci në tregun botëror. Për 100 euro të ardhura, mbi 90 paguhen dëme. Brenda normës evropiane, dëshmon stabilitet.”
“Kompanitë shqiptare kanë paguar 20-25% më tepër për risigurimin nga gjigantët evropianë. Kjo ia ka rritur vlerën trajtimit të dëmeve, por nga ana tjetër është ‘faturë e seriozitetit dhe garancisë’, pasi risigurimi nga gjigantët evropianë është garanci e nevojshme.”
“Në këtë këndvështrim, shifrat që tregojnë më shumë të ardhura dhe më pak dëme nuk përbëjnë automatikisht provë për abuzim, por pasqyrojnë dinamikat dhe ciklet e tregut të sigurimeve”.
Si një nga mediat online që ka raportuar vazhdimisht mbi tregun e sigurimeve, Skyweb.al mbetet i përkushtuar për të ndjekur nga afër zhvillimet në këtë sektori duke iu përgjigjur edhe interesit të lexuesve për një analizë të pavarur. /skyweb.al
