Shqipëria do të zgjerojë rrjetin e stacioneve të karikimit për automjetet elektrike, duke synuar vendosjen e pikave të karikimit të shpejtë çdo 60 deri në 100 kilometra në korridoret kryesore rrugore të vendit.
Masa parashikohet në Strategjinë Sektoriale të Transportit dhe Planin e Veprimit 2030, të miratuar sëfundmi nga qeveria.
Sipas strategjisë, stacionet e karikimit të shpejtë do të vendosen çdo 60 kilometra në rrjetin bazë të transportit TEN-T, ndërsa në rrjetin gjithëpërfshirës distanca e parashikuar është çdo 100 kilometra.
Qëllimi është krijimi i një infrastrukture që u mundëson drejtuesve të automjeteve elektrike të udhëtojnë në distanca të gjata pa u përballur me mungesën e pikave të karikimit.
Rrjeti do të zhvillohet në përputhje me standardet e Bashkimit Europian për infrastrukturën e karburanteve alternative, duke përfshirë korridoret kryesore të transportit dhe qendrat më të rëndësishme urbane.
Për zgjerimin e infrastrukturës së karikimit dhe furnizimit me karburante alternative, qeveria ka parashikuar një projekt me vlerë 11.5 milionë euro.
Sipas Planit të Veprimit, zbatimi i tij do të nisë në vitin 2027 dhe parashikohet të përfundojë në vitin 2031.
Investimi nuk kufizohet vetëm te stacionet elektrike, por përfshin zhvillimin e infrastrukturës së furnizimit me karburante alternative, si pjesë e kalimit gradual drejt një transporti me ndotje më të ulët.
Në zbatimin e projektit do të përfshihen Ministria e Infrastrukturës dhe Energjisë, Autoriteti Rrugor Shqiptar, DPSHTRR-ja, Agjencia për Eficiencën e Energjisë dhe institucione të tjera përgjegjëse për sektorin energjetik.
Strategjia parashikon gjithashtu modernizimin gradual të flotës së automjeteve, përmes nxitjes së përdorimit të mjeteve elektrike, hibride dhe teknologjive me emetime të ulëta.
Paralelisht, gjatë periudhës 2027–2030, qeveria synon zbatimin e standardeve europiane për emetimet e automjeteve dhe heqjen graduale të kategorive të vjetruara EURO.
Strategjia e transportit kushton 4.45 miliardë euro
Zgjerimi i rrjetit të karikimit është vetëm një pjesë e investimeve të parashikuara në strategjinë e re të transportit.
Sipas dokumentit, kostoja e përgjithshme e masave dhe investimeve për periudhën 2026–2030 llogaritet në rreth 4.45 miliardë euro.
Pjesa dërrmuese e fondeve, rreth 4.26 miliardë euro, parashikohet për ndërtimin dhe modernizimin e infrastrukturës së transportit dhe lidhjen e Shqipërisë me rrjetet europiane TEN-T.
Ndërkohë, rreth 157.7 milionë euro janë planifikuar për lëvizshmërinë e qëndrueshme, ku përfshihen masat për uljen e ndotjes, zhvillimin e infrastrukturës së karburanteve alternative dhe modernizimin e transportit.
Nga kostoja totale e strategjisë, rreth 1.15 miliardë euro rezultojnë ende pa burime të identifikuara financimi.
Qeveria synon të mbulojë këtë hendek përmes financimeve shtesë nga buxheti i shtetit, institucionet financiare ndërkombëtare dhe programet mbështetëse të Bashkimit Europian.
Strategjia parashikon që deri në fund të dekadës Shqipëria të ketë një sistem transporti më modern, me infrastrukturë të zgjeruar për automjetet elektrike dhe me standarde më të larta për mbrojtjen e mjedisit. /skyweb.al
