Një aksident ajror do të simulohet sot pranë Aeroportit Ndërkombëtar të Tiranës “Nënë Tereza”, në kuadër të një stërvitjeje të përbashkët të forcave të sigurisë dhe strukturave të emergjencave.
Ministria e Mbrojtjes njofton se stërvitja “SAR-2026” do të zhvillohet më 4 nëntor, nga ora 10:30 deri në orën 12:00, në zonën pranë aeroportit të Rinasit.
Skenari parashikon daljen e një avioni nga pista dhe përplasjen e tij jashtë rrethimit të aeroportit, duke aktivizuar procedurat e ndërhyrjes në rast aksidenti ajror.
Në operacionin e simuluar do të angazhohen Forcat e Armatosura, Policia e Shtetit, Aeroporti Ndërkombëtar i Tiranës, ALBCONTROL dhe Autoriteti Kombëtar i Investigimit për Sigurinë e Operimit në Aviacionin Civil.
Pjesë e stërvitjes do të jenë gjithashtu Qendra Kombëtare e Urgjencës Mjekësore, shërbimet zjarrfikëse dhe të shpëtimit, si dhe Kryqi i Kuq Shqiptar.
Stërvitja organizohet nga Qendra Kombëtare e Kërkim-Shpëtimit dhe synon të testojë gatishmërinë e institucioneve për të reaguar në rast të një aksidenti të rëndë në aviacionin civil.
Gjatë simulimit do të provohen procedurat e kërkimit dhe shpëtimit, evakuimit të pasagjerëve dhe ekuipazhit, ofrimit të ndihmës së parë dhe koordinimit ndërmjet institucioneve.
Ministria e Mbrojtjes paralajmëron se gjatë këtyre orëve mund të ketë lëvizje të shtuara të automjeteve të policisë, ambulancave, zjarrfikëseve dhe mjeteve të tjera të emergjencës në afërsi të aeroportit.
Autoritetet sqarojnë se bëhet fjalë për një stërvitje të planifikuar dhe se nuk ka asnjë aksident apo emergjencë reale.
Sipas Ministrisë së Mbrojtjes, aktiviteti synon përmirësimin e bashkëpunimit mes institucioneve dhe forcimin e kapaciteteve për përballimin e situatave të emergjencës në transportin ajror.
