Dhjetëra pika karburanti dhe lavazhe kanë ushtruar aktivitet pa licencat dhe autorizimet përkatëse në Vlorë, ndërsa strukturat bashkiake nuk kanë marrë masat e nevojshme për kontrollin dhe formalizimin e tyre. Shkeljet janë konstatuar nga Kontrolli i Lartë i Shtetit në raportin përfundimtar të auditimit të Bashkisë Vlorë për vitin 2025.
Sipas KLSH-së, nga 40 subjekte që ushtronin aktivitet në tregtimin me pakicë të karburanteve, 18 rezultuan pa licencë, duke krijuar 18 milionë lekë të ardhura të munguara për buxhetin vendor nga tarifat e licencimit.
Megjithëse këto subjekte vijonin aktivitetin, bashkia nuk kishte dokumentuar njoftimin e Inspektoratit Shtetëror Teknik Industrial për marrjen e masave të bllokimit të tyre.
Madje, për katër pika karburanti të identifikuara përmes të dhënave të institucioneve të tjera shtetërore, drejtoria përgjegjëse e Bashkisë Vlorë nuk dispononte informacionin dhe dokumentacionin përkatës.
Situata paraqitet edhe më problematike te lavazhet.
KLSH ka konstatuar se 51 subjekte ushtronin aktivitet si lavazhe gjatë vitit 2025, por asnjëri prej tyre nuk ishte pajisur me autorizimin përkatës nga bashkia.
Parregullsitë shtrihen edhe në sektorin e ndërtimit, ku KLSH ka identifikuar 46 raste subjektesh që kishin kryer punime në territorin e bashkisë, pa u ngarkuar me tarifat përkatëse të pastrimit, ndriçimit dhe gjelbërimit.
Probleme janë konstatuar edhe me administrimin e plazheve. Sipas auditimit, 13 subjekte që kishin detyrime të papaguara ndaj bashkisë ishin pajisur përsëri me hapësira për stacione plazhi gjatë vitit 2025.
Këto gjetje nxjerrin në pah një problem më të gjerë të administrimit të territorit, ku një pjesë e bizneseve funksionojnë pa përmbushur detyrimet ligjore, ndërsa institucionet përgjegjëse nuk arrijnë të garantojnë zbatimin e rregullave për të gjithë.
E gjithë kjo ndodh ndërkohë që qeveria ka përgatitur një paketë të re fiskale për vitin 2027, e cila parashikon rritjen e barrës tatimore dhe të kostove për një pjesë të bizneseve dhe qytetarëve.
Në vend që të përqendrohet te lufta kundër informalitetit dhe mbledhja e detyrimeve nga subjektet që nuk paguajnë, pra zgjerimi i bazës së tatimpaguesve, politika fiskale po shkon drejt rëndimit të mëtejshëm të atyre që janë pjesë e sistemit dhe i paguajnë rregullisht taksat.
Vetëm nga mungesa e licencimit të 18 pikave të karburantit dhe autorizimeve për 51 lavazhe, Bashkia Vlorë ka lënë pa mbledhur mbi 18.5 milionë lekë nga tarifat përkatëse.
Këtyre u shtohen miliona lekë të tjera nga tarifat e papaguara të ndërtimeve, qiratë e plazheve dhe detyrimet e tjera vendore.
Në total, sipas KLSH-së, detyrimet e akumuluara nga taksat dhe tarifat vendore ndaj Bashkisë Vlorë kishin arritur në 829.6 milionë lekë në fund të vitit 2025, me një rritje prej 10.5 milionë lekësh krahasuar me një vit më parë.
Ndërsa qeveria përpiqet të mbledhë më shumë para përmes taksave të reja dhe rritjes së atyre ekzistuese, në Bashkinë Vlorë rezultojnë dhjetëra aktivitete ekonomike të palicencuara ose të paautorizuara, për të cilat nuk janë marrë masat e duhura.
Barra bie mbi bizneset e rregullta dhe qytetarët, ndërsa mungesa e kontrollit dhe mosveprimi i institucioneve krijojnë kushte për konkurrencë të pandershme dhe humbje të të ardhurave publike. /skyweb.al
