Çmimet e naftës në tregjet ndërkombëtare kanë arritur një tjetër rekord këtë të enjte, me Brent që ka kaluar mbi 125 dollarë për fuçi, duke reflektuar tensionet në rritje në Lindjen e Mesme.
Rritja vjen vetëm një ditë pasi nafta arriti nivelin 119.71 dollarë, ndërsa para nisjes së luftës në fund të muajit shkurt, çmimi ishte rreth 70 dollarë për fuçi. Kjo përkthehet në një rritje prej më shumë se 70% brenda pak javësh.
Tregjet po reagojnë ndaj frikës për një përshkallëzim të mëtejshëm të konfliktit dhe për një zgjatje të bllokadës së porteve iraniane nga Shtetet e Bashkuara.
Situata është përkeqësuar edhe nga mbyllja e Ngushticës së Hormuzit, një nga rrugët më të rëndësishme për transportin global të naftës, duke kufizuar ndjeshëm furnizimin në tregjet ndërkombëtare.
Zhvillimet e fundit politike kanë shtuar më tej pasigurinë. Administrata amerikane po shqyrton mundësinë e zgjatjes së bllokadës për muaj të tërë, ndërsa përpjekjet për negociata mes SHBA-së dhe Iranit kanë dështuar, duke e lënë konfliktin në një ngërç të rrezikshëm.
Presidenti amerikan Donald Trump ka paralajmëruar se presioni ndaj Iranit do të vijojë, duke rritur shqetësimet se kriza mund të zgjasë dhe të ketë ndikim të drejtpërdrejtë në tregjet globale të energjisë.
Në këtë situatë, analistët paralajmërojnë se çmimet mund të mbeten të larta ose të rriten më tej nëse tensionet nuk ulen, ndërsa tregu i naftës mbetet një nga më të ndjeshmit ndaj zhvillimeve gjeopolitike. /skyweb.al
