Banka Kombëtare e Serbisë ka vendosur t’i heqë licencën ALTA Banka-s, institucionit financiar të kontrolluar nga biznesmeni Davor Macura, i njohur për lidhjet e tij me qarqet politike pranë Aleksandar Vuçiçit.
Vendimi është bërë publik këtë të shtunë, më 31 tetor, ndërsa paralelisht Prokuroria për Krimin e Organizuar ka nisur verifikimet për transferta të dyshimta parash jashtë Serbisë.
Sipas mediave serbe N1, Nova.rs dhe Danas, autoritetet po hetojnë lëvizjet e fondeve nga ALTA Banka, pas informacioneve se shuma të konsiderueshme mund të jenë transferuar jashtë vendit.
Prokuroria ka konfirmuar se më 27 tetor i ka kërkuar Bankës Kombëtare të Serbisë të dhënat për të gjitha transfertat ndërkombëtare të kryera nga ALTA Banka prej datës 27 shtator.
Dy ditë më vonë, hetuesit kanë kërkuar informacione shtesë për konvertimin e parave dhe daljen e fondeve drejt llogarive jashtë Serbisë.
Më 30 tetor, Prokuroria ka ngarkuar strukturat kundër krimit të organizuar të verifikojnë aktivitetin e bankës, por edhe veprimet e zyrtarëve përgjegjës të Bankës Kombëtare.
Ndërkohë, autoriteti mbikëqyrës bankar ka depozituar një kallëzim penal kundër ALTA Banka-s dhe disa personave përgjegjës.
Sipas njoftimit zyrtar, heqja e licencës erdhi pasi kontrollet konstatuan një përkeqësim të ndjeshëm të gjendjes financiare dhe likuiditetit, duke rrezikuar interesat e depozituesve.
Agjencia për Sigurimin e Depozitave do të marrë administrimin e procedurave të falimentimit, ndërsa kursimet janë të garantuara deri në 50 mijë euro për depozitues.
Vetë banka ka njoftuar pezullimin e veprimeve me kartat, transfertave bankare dhe shërbimeve në degët e saj.
Në qendër të zhvillimeve është biznesmeni Davor Macura, i cili e nisi aktivitetin në vitin 2008 me një zyrë këmbimi valutor në Zemun të Beogradit.
Brenda pak vitesh, ai ndërtoi një grup të madh biznesesh në sektorin financiar dhe në vitin 2019 u bë aksioneri kryesor i JUBMES Banka-s, e cila më pas mori emrin ALTA Banka.
Rritja e shpejtë e biznesit të Macurës është shoqëruar me akuza të vazhdueshme nga opozita serbe për marrëdhënie të privilegjuara me pushtetin.
Në dhjetor 2025, deputetja opozitare Marinika Tepić e akuzoi publikisht biznesmenin se shërbente si mbulesë për operacione financiare të Aleksandar dhe Andrej Vuçiçit.
Ajo ngriti dyshime për pastrim parash dhe përdorimin e strukturave financiare në shërbim të njerëzve të lidhur me pushtetin, akuza që nuk janë provuar me vendim gjyqësor.
Së fundmi, në mediat serbe janë publikuar edhe informacione për transferta të mundshme drejt llogarive në Shkup dhe Moskë.
Një tjetër zhvillim është reagimi i katër zëvendësguvernatorëve të Bankës Kombëtare, të cilët kanë kërkuar verifikimin e përgjegjësive të mundshme brenda institucionit për gjendjen e krijuar.
Ata kanë ngritur pikëpyetje mbi faktin se situata reale financiare e ALTA Banka-s rezultonte shumë më problematike sesa të dhënat e raportuara më parë.
Mbyllja e bankës vjen vetëm pak ditë pas zgjedhjeve të 25 tetorit në Serbi, ku Partia Përparimtare Serbe e Vuçiçit humbi pushtetin pas 14 vitesh.
Ndërkohë, hetimet do të përcaktojnë nëse përkeqësimi financiar i ALTA Banka-s lidhet edhe me transferimin e fondeve jashtë vendit dhe nëse në këtë proces janë përfshirë persona të lidhur me ish-pushtetin. /skyweb.al
