Kryeministri Edi Rama lëshoi kritika të forta ndaj Bashkimit Evropian gjatë pjesëmarrjes në Forumin “Future Investment Initiative” që po mbahet në Riad të Arabisë Saudite.
I ftuar në panelin me temë “A po shkon njerëzimi në drejtimin e duhur?”, ku morën pjesë figura të njohura ndërkombëtare si presidentët Paul Kagame, Mohamed Irfaan Ali, Shehbaz Sharif, themeluesi i Bridgewater AssociatesRay Dalio dhe presidenti i FIFA-s Gianni Infantino, Rama shprehu shqetësimin e tij për drejtimin që ka marrë politika evropiane në raport me luftën dhe paqen.
Në një diskutim të drejtpërdrejtë me moderatorin Richard Attias, Rama deklaroi se Evropa po humb busullën e saj morale, duke u fokusuar gjithnjë e më shumë tek armatimet, ndërsa mungon çdo plan real për paqe.
“Ka diçka thelbësisht të gabuar në faktin që ka një nxitim të përditshëm për t’u riarmatosur, për të menduar e për të punuar gjithmonë e më tepër për më shumë armë, ndërkohë që nuk ka asnjë plan paqeje që mund të lexohet e të kuptohet. Një Europë që nuk ka planin e saj të paqes, është një Europë e ngecur në një pozicion të gabuar,” – tha Rama.
Kryeministri shtoi se kontinenti po kthehet në një hapësirë ku “fjala bërthamore” është bërë normale në diskursin publik dhe diplomatik, duke paralajmëruar për pasojat e kësaj gjendjeje.
“Si europian i palëkundur ndihem i shqetësuar që fjala ‘bërthamore’ është bërë diçka e zakonshme në fjalor. Kërcënimet e hapura apo të nënkuptuara me raketa bërthamore janë çmenduri,” – theksoi ai.
Rama tha se Evropa ka nevojë për një “dush përulësie”, siç shprehen italianët, për të reflektuar mbi rolin e saj në botë dhe për të mos marrë si të mirëqenë legjitimitetin moral që dikur e udhëhiqte.
“Europa duhet të marrë një dush modestie dhe të reflektojë më shumë mbi atë që po ndodh në pjesët e tjera të botës. Duhet të mësojë, të rifilloje dhe të mos e marrë më të mirëqenë ndjenjën e vet të drejtësisë morale,” – u shpreh Rama.
Shefi i qeverisë shqiptare theksoi gjithashtu se, ndonëse vjen nga një vend i vogël, ndien detyrim moral të shprehë shqetësimin për mungesën e vizionit të kontinentit që Shqipëria aspiron të bëhet pjesë e plotë e tij.
Në margjinat e forumit, Rama zhvilloi takime me drejtues të organizatave ndërkombëtare dhe kompanive të mëdha, ku diskutoi mbi mundësitë për investime të huaja në sektorë strategjikë të ekonomisë shqiptare. /skyweb.al
