Bordi i Transparencës ka vendosur çmimet e reja të shitjes së karburanteve në vend. Sipas vendimit të marrë këtë të enjte, 12 nëntor, çmimi maksimal i shitjes me pakicë i gazoilit do të jetë 210 lekë për litër, ndërsa ai i shitjes me shumicë 198 lekë për litër.
Edhe për benzinën është përcaktuar një çmim i ri. Ajo do të tregtohet me jo më shumë se 165 lekë për litër në pikat e shitjes me pakicë dhe 153 lekë për litër në tregtimin me shumicë.
Ndërkohë, çmimi i gazit për automjetet do të jetë 71 lekë për litër në pakicë dhe 59 lekë për litër në shumicë. Për aktivitetin e peshkimit, gazoili do të tregtohet me 114 lekë për litër.
Çmimet e reja hyjnë në fuqi sot, në orën 18:30, dhe do të mbeten të vlefshme deri në mbledhjen e ardhshme të Bordit, kur do të rishikohen në varësi të ndryshimeve në treg.
Bordi u ka tërhequr vëmendjen operatorëve të tregtimit me shumicë dhe pakicë për zbatimin e detyrueshëm të vendimit, duke paralajmëruar se në rast shkeljesh do të vendoset pezullimi i aktivitetit. /skyweb.al
