Rënia historike e euros përballë lekut ka ngritur prej kohësh dyshime mbi burimin e sasive të mëdha të euros që hyjnë në Shqipëri.
Sot, sipas kursit zyrtar të Bankës së Shqipërisë, një euro u këmbye mesatarisht me më pak se 94 lekë, një nga nivelet më të ulëta të regjistruara ndonjëherë.
Por dosjet e SPAK, që ka konsultuar skyweb.al, hedhin dritë mbi një tjetër anë të ekonomisë informale: Paratë e trafikut të kokainës që, sipas hetimeve, investohen në ndërtim, kulla, vila, toka private, toka të tjetërsuara dhe prona shtetërore të kaluar në duar private.
Në dosjen ku akuzohen Ilir Shtufi, Luçiano Koçeku dhe persona të tjerë, SPAK përshkruan mënyrën se si anëtarë të grupit dyshohet se pastronin para në sektorin e ndërtimit, kryesisht në Tiranë dhe në jug të vendit.
Një nga episodet më domethënëse lidhet me zonën pranë Gardës së Republikës, afër Liqenit Artificial të Tiranës, ku persona të grupit shfaqin interes për ndërtimin e një kulle.
Në një komunikim të interceptuar nga SPAK në maj 2020, dy prej personave nën hetim flasin për ecurinë e procedurave dhe për faktin se pritej një vendim i Këshillit të Ministrave për ndryshimin e statusit të tokës dhe regjistrimin e saj në hipotekë.
“Kusho, Garda në rregull ka qen, takim Ilir dje, ka kalu, esht shpall fitusi. Javën tjetër presim një VKM për ndrimin e tokës në hipotek, max 10 dit, 2 jav myllen kontratat”, shkruan njëri prej tyre në komunikimin e administruar në dosje.
Bashkëbiseduesi përgjigjet: “Ok super kush, po shifemi me von”.
Ajo që e bën më të rëndë këtë episod është fakti se persona të dyshuar për trafik droge dhe pastrim parash duket se kishin informacion paraprak për një vendimmarrje të qeverisë, që pritej të ndodhte në ditët apo javët në vijim.
Sipas dosjes, Ilir Shtufi del si personi që kishte dijeni dhe interesim për këtë procedurë, ndërsa komunikimi tregon se grupi e lidhte ecurinë e kontratave me miratimin e një VKM-je.
SPAK dyshon se paratë e përfituara nga trafiku ndërkombëtar i kokainës janë kanalizuar në pasuri të paluajtshme, duke u përdorur për blerje tokash, ndërtim vilash dhe projekte ndërtimore me vlera të mëdha. /skyweb.al
