Organizata Botërore e Shëndetësisë (OBSH) ka paralajmëruar se Evropa duhet të jetë më e përgatitur për javë të tjera vdekjeprurëse me temperatura ekstreme.
Vala e radhës e të nxehtit tashmë po formohet mbi Oqeanin Atlantik. Portugalia dhe jugu i Spanjës pritet të arrijnë temperatura deri në 43°C këtë javë, ndërsa Franca dhe vendet e Beneluksit po përgatiten për një tjetër valë të fortë të të nxehtit. Edhe pjesë të Azisë Qendrore po përballen me temperatura që arrijnë në 40°C. Megjithatë, sipas Drejtorit Rajonal të OBSH-së për Evropën, Hans Kluge, Evropa nuk është e përgatitur për këtë situatë, sipas Euronews.com.
Kluge paralajmëroi se më pak se gjysma e vendeve të Rajonit Evropian kanë plane kombëtare për menaxhimin e rreziqeve shëndetësore që lidhen me të nxehtin ekstrem, të njohura nga OBSH-ja si Plane të Veprimit për Shëndetin gjatë Valëve të të Nxehtit (Heat-health Action Plans).
Ai theksoi se të gjitha vendet duhet të kenë plane të tilla, të cilat të përfshijnë sisteme të paralajmërimit të hershëm meteorologjik, mbështetje për grupet më të rrezikuara dhe koordinim mes autoriteteve të shëndetësisë, shëndetit në punë, kujdesit social, strehimit dhe planifikimit urban.
“Vendet që kanë plane funksionale e dinë paraprakisht se kush është përgjegjës për çfarë, cilat grupe të popullsisë janë më të rrezikuara dhe në cilin prag temperature aktivizohet çdo nivel i reagimit,” tha Kluge. Ai shtoi se kjo qartësi, përpara se të godasë një valë e të nxehtit, përbën “dallimin që shpëton jetë” mes një reagimi të mirëmenaxhuar dhe një reagimi të vonuar.
“Puna tani zhvillohet në dy drejtime,” tha ai. “Së pari, të korrigjohen dështimet e javëve të fundit përpara se të godasë vala e ardhshme e të nxehtit, dhe së dyti, të ndërtohen sisteme shëndetësore që jo vetëm reagojnë ndaj temperaturave ekstreme, por janë të përgatitura për to.”
Sipas të dhënave paraprake nga Evropa Perëndimore, temperaturat rekord të muajit qershor shkaktuan mbi 4.000 vdekje shtesë, duke vënë nën presion të madh sistemet shëndetësore.
Për të shmangur përsëritjen e të njëjtit skenar, Kluge zhvilloi një takim urgjent mbi të nxehtin ekstrem, ku morën pjesë përfaqësues nga 41 vende evropiane, Komisioni Evropian dhe organizata të shoqërisë civile, për të analizuar mësimet e nxjerra nga vala e fundit e të nxehtit.
Shefi i OBSH-së për Evropën vlerësoi nisma si sistemi italian i monitorimit të vdekshmërisë, strategjia e komunikimit me mediat në Spanjë dhe plani i përditësuar i Austrisë për përballimin e valëve të të nxehtit.
“Këta shembuj janë të rëndësishëm sepse mund të zbatohen edhe në vende të tjera,” tha Kluge, duke theksuar se mjetet dhe zgjidhjet tashmë ekzistojnë. “Kur planet përgatiten dhe testohen përpara se të shpërthejë një krizë, ato shpëtojnë jetë.” /skyweb.al
