Diga e Liqenit të Farkës në Tiranë paraqet probleme serioze në infrastrukturën e saj, ndërsa Bashkia e Tiranës nuk ka hartuar plane gatishmërie për emergjencat civile për 37 nga 38 digat e mëdha që ka në administrim.
Gjetjet janë bërë nga Kontrolli i Lartë i Shtetit, i cili gjatë një auditimi ka evidentuar dëmtime në strukturën e digës së Farkës, mungesë investimesh në diga të tjera dhe mangësi në masat për përballimin e situatave emergjente.
Siç shkruan InfoNews, gjatë inspektimit në terren, audituesit e KLSH-së konstatuan se njëri prej shkarkuesve fundorë të digës së Farkës është jashtë funksionit, ndërsa shtresa e betonit në kurorën e saj ka pësuar dëmtime.
Sipas auditimit, dëmtimet e betonit janë shkaktuar kryesisht nga qarkullimi i mjeteve të tonazhit të rëndë mbi digë. Probleme janë evidentuar edhe në fugat e perdes së betonit të skarpatës së sipërme.
Situata merr rëndësi të veçantë për shkak të zhvillimit intensiv ndërtimor në zonën përreth Liqenit të Farkës, ku vitet e fundit janë ngritur komplekse banimi dhe vila, duke shtuar qarkullimin e kamionëve dhe mjeteve të tjera të rënda.
Pavarësisht dëmtimeve të konstatuara, sipas raportimit, mbi kurorën e digës vijon të ketë lëvizje të mjeteve të tonazhit të rëndë, duke ngritur pikëpyetje për masat e kontrollit dhe mbrojtjes së kësaj infrastrukture.
Diga e Farkës është ndërtuar në vitin 1984, ka një lartësi prej 32 metrash dhe një kurorë me gjatësi 310 metra. Ajo shërben për mbajtjen e ujërave të rezervuarit, i ndërtuar fillimisht për ujitjen e tokave bujqësore.
Në shkurt 2024, Bashkia e Tiranës aplikoi pranë Fondit për Digat, në Agjencinë Kombëtare të Mbrojtjes Civile, për financimin e projektit të rikonstruksionit të digës së Farkës. Sipas dokumentacionit të administruar nga KLSH, bashkia ka përfituar financim, por auditimi ka evidentuar problematikat e mësipërme në gjendjen e veprës.
Ndërkohë, problemet shtrihen edhe në diga të tjera të administruara nga Bashkia e Tiranës.
Komiteti Kombëtar i Digave të Mëdha, përmes një shkrese të datës 31 janar 2024, kishte identifikuar si prioritare për ndërhyrje urgjente edhe digat e Kasharit dhe Çekrezës.
Megjithatë, sipas KLSH-së, Bashkia e Tiranës nuk kishte aplikuar për financim pranë Fondit për Digat për këto dy vepra dhe nuk kishte parashikuar ndërhyrje rehabilituese me fondet e veta.
Një nga konstatimet më shqetësuese të auditimit lidhet me mungesën e planeve të emergjencave civile.
Nga 38 diga të mëdha që Bashkia e Tiranës ka në shfrytëzim, vetëm diga e Farkës rezulton të ketë një Plan Gatishmërie për Emergjencat Civile.
Për 37 digat e tjera mungon ky dokument, i cili është i rëndësishëm për përcaktimin e masave dhe procedurave që duhet të ndiqen në rast incidentesh apo situatash të jashtëzakonshme.
KLSH vlerëson se mungesa e planeve të gatishmërisë, së bashku me investimet e pamjaftueshme dhe mangësitë në rehabilitimin e veprave, cenon përgatitjen për përballimin e emergjencave dhe rrit ekspozimin ndaj pasojave të mundshme ekonomike, mjedisore dhe sociale.
Gjetjet ngrenë pikëpyetje mbi administrimin e sigurisë së digave nga Bashkia e Tiranës, veçanërisht në kushtet kur disa prej tyre janë identifikuar nga institucionet përgjegjëse si vepra që kërkojnë ndërhyrje urgjente.















