Një pikturë e artistit holandez Vincent van Gogh është shitur për 190,4 milionë dollarë në një ankand të organizuar nga shtëpia “Sotheby’s” në Nju Jork, duke vendosur një rekord të ri për veprat e tij të shitura në ankand.
Piktura, e titulluar “Châtaigniers en fleurs” (Gështenjat në lulëzim), paraqet një peizazh me pemë gështenjash të mbuluara me lule. Ajo u realizua gjatë dy muajve të fundit të jetës së artistit, në një periudhë që “Sotheby’s” e përshkruan si një nga fazat më intensive dhe shprehëse të krijimtarisë së tij.
Shitja u shoqërua me një mosmarrëveshje ligjore, pasi pasardhësit e botuesit gjerman Samuel Fischer pretendonin se vepra ishte shitur në vitin 1936 në kushte të detyruara, për shkak të përndjekjeve naziste. Megjithatë, pak orë para ankandit, trashëgimtarët e familjes Fischer dhe familja Blaquier-Arrieta, pronare e pikturës që prej vitit 1975, arritën një marrëveshje.
Me këtë shitje, vepra e Van Gogh-ut renditet gjithashtu si e dyta më e shtrenjtë e shitur ndonjëherë në ankandet e “Sotheby’s”. Rekordi mbahet nga portreti i Elisabeth Lederer, i Gustav Klimt, i shitur për 236,4 milionë dollarë. /skyweb.al















