Agjencia Kombëtare e Mbrojtjes Civile ka lëshuar një paralajmërim për përkeqësimin e kushteve atmosferike në veri të vendit, ku gjatë datave 18 dhe 19 nëntor priten reshje intensive shiu, të cilat mund të shkaktojnë përmbytje dhe rrëshqitje dherash.
Sipas parashikimeve të Institutit të Gjeoshkencave (IGJEO) dhe Shërbimit Meteorologjik Ushtarak, gjatë ditës së sotme, 18 nëntor, situata më problematike pritet të jetë në qarkun e Shkodrës, ku parashikohen reshje intensive deri lokalisht shumë intensive.
Në qarqet Kukës, Dibër dhe Lezhë priten reshje mesatare deri lokalisht intensive, të shoqëruara me shtrëngata.
Situata pritet të vijojë edhe të enjten, më 19 nëntor, kur reshjet intensive deri lokalisht shumë intensive do të përfshijnë qarqet Shkodër dhe Kukës, ndërsa në Dibër parashikohen reshje intensive.
Agjencia Kombëtare e Mbrojtjes Civile paralajmëron se sasia e reshjeve mund të shkaktojë grumbullime uji dhe përmbytje të lokalizuara në disa zona urbane.
Ndërkohë, në zonat malore ekziston rreziku i vërshimeve të përrenjve dhe rrëshqitjeve të dherave, duke krijuar probleme të mundshme për qarkullimin dhe sigurinë e banorëve.
Përballë kësaj situate, Mbrojtja Civile u ka kërkuar strukturave vendore të marrin masa parandaluese, të monitorojnë zonat e ekspozuara ndaj rrezikut dhe të mbajnë në gatishmëri kapacitetet për ndërhyrje emergjente.
Autoritetet u bëjnë thirrje qytetarëve të tregojnë kujdes gjatë lëvizjeve, veçanërisht në zonat ku ekziston rreziku i përmbytjeve dhe rrëshqitjeve të dherave.
Agjencia Kombëtare e Mbrojtjes Civile njofton se po monitoron situatën në bashkëpunim me institucionet përgjegjëse, me qëllim marrjen e masave në kohë dhe garantimin e sigurisë së qytetarëve.
















