Spanja, një nga liderët evropianë në energjinë diellore, po përballet me pasojat e një rritjeje të shpejtë të kapaciteteve të saj.
Investimet masive në panele fotovoltaike e kanë çuar vendin në prodhimin e sasive të mëdha të energjisë, shpeshherë shumë më tepër se nevojat e tregut.
Kjo tepricë ka sjellë rënie drastike të çmimeve të energjisë në tregun e lirë, duke ulur fitimet e operatorëve dhe në disa raste, duke i detyruar ata të ndalojnë prodhimin për të shmangur mbingarkimin e rrjetit.
Aktualisht, Spanja ka rreth 36 gigavat kapacitet diellor të instaluar dhe synon të arrijë 76 gigavat deri në vitin 2030.
Ekspertët paralajmërojnë se mungesa e infrastrukturës për magazinimin e energjisë dhe fleksibilitetin e rrjetit po pengon menaxhimin e prodhimit, çka u bë e dukshme edhe gjatë një ndërprerjeje masive të energjisë në prill, që preku rreth 58 milionë njerëz.
Ndërkohë, qeveria ka propozuar reforma për zgjerimin e kapaciteteve të ruajtjes së energjisë dhe përmirësimin e rrjetit elektrik, por projektligjet përkatëse janë bllokuar në parlament.
Përfaqësues të industrisë shpresojnë se rritja e kërkesës nga sektori industrial dhe qendrat e të dhënave do të ndihmojë në absorbimin e tepricave, edhe pse procesi po pengohet nga vonesat në lidhjen me rrjetin.
Autoritetet spanjolle theksojnë se kriza aktuale është e përkohshme dhe se balancimi mes ofertës dhe kërkesës do të arrihet me zhvillimin e infrastrukturës. /FT
