Presidenti amerikan Donald Trump deklaroi të hënën se ari nuk do t’i nënshtrohet tarifave doganore, duke hedhur poshtë një vendim të mëparshëm të autoriteteve doganore të SHBA-së që parashikonte detyrime për shufrat e arit të importuara nga Zvicra.
“Nuk do të ketë tarifa për arin!” shkroi Trump në një postim në Truth Social.
Pas njoftimit, kontratat e së ardhmes për arin u mbyllën me një rënie prej 2,48 për qind, në nivelin 3.404,70 dollarë për ons.
Vendimi i mëparshëm parashikonte që shufrat e arit me peshë 1 kilogram dhe 100 ons, të prodhuara në Zvicër, të përfshiheshin në tarifën 39 për qind të vendosur nga administrata Trump ndaj këtij vendi.
Këto shufra përdoren për të mbështetur kontratat në bursën e mallrave COMEX, tregu kryesor për arin, argjendin dhe metalet e tjera të çmuara.
Sipas Shoqatës Zvicerane të Metaleve të Çmuara, vendimi do të zbatohej jo vetëm për Zvicrën, por edhe për çdo vend tjetër eksportues të këtij formati shufrash drejt SHBA-së, duke u bazuar në normën e tarifës përkatëse që aplikohet për vendin e origjinës.
Shoqata paralajmëroi se një masë e tillë “mund të ndikojë negativisht në qarkullimin ndërkombëtar të arit fizik”.
Më 7 gusht, Trump kishte vendosur atë që e quajti “tarifa reciproke” ndaj dhjetëra partnerëve tregtarë të SHBA-së./skyweb.al
