Autoriteti Kombëtar për Sigurinë Kibernetike (AKSK) ka paralajmëruar qytetarët për një skemë mashtrimi përmes mesazheve SMS, të cilat përdorin emrin e Drejtorisë së Përgjithshme të Shërbimeve të Transportit Rrugor (DPSHTRR) për të përfituar të dhëna personale dhe bankare.
Sipas njoftimit të AKSK-së, qytetarët po marrin mesazhe ku pretendohet se kanë kryer shkelje të rregullave të qarkullimit rrugor ose kanë detyrime të papaguara. Përmes këtyre mesazheve, ata nxiten të klikojnë në lidhje të dyshimta dhe të vendosin të dhënat e tyre personale, duke u kërcënuar me penalizime nëse nuk veprojnë menjëherë.
Autoriteti thekson se bëhet fjalë për tentativa mashtrimi dhe u bën thirrje qytetarëve të mos klikojnë në këto lidhje dhe të mos u përgjigjen mesazheve të tilla. Gjithashtu, këshillohet që të mos ndajnë të dhëna personale, informacione bankare apo kode verifikimi.
AKSK bën me dije se, në bashkëpunim me institucionet përgjegjëse, ka marrë masat e nevojshme për adresimin e këtij rasti dhe vijon monitorimin për të identifikuar tentativa të ngjashme mashtrimi, me qëllim kufizimin e rrezikut për qytetarët.
Qytetarët këshillohen që çdo njoftim për gjoba apo detyrime të papaguara ta verifikojnë vetëm përmes kanaleve zyrtare të institucioneve përkatëse, duke hyrë vetë në faqet zyrtare dhe jo përmes lidhjeve të dërguara me SMS.
Autoriteti paralajmëron se përdorimi i emrit apo logos së një institucioni nuk garanton vërtetësinë e mesazhit. Lidhjet e pazakonta, presioni për të vepruar menjëherë dhe kërcënimet me penalizime janë shenja që duhet të ngrenë dyshime.
AKSK u bën thirrje qytetarëve të tregojnë kujdes, të bllokojnë numrat e dyshimtë dhe të raportojnë mesazhet mashtruese.
