Presidenti i Republikës, Bajram Begaj, dhe Presidenti i Italisë, Sergio Mattarella, pritën sot së bashku në Pallatin Quirinale kryetarët e të gjitha komunave arbëreshe në Itali.
Takimi iu kushtua komunitetit arbëresh, i cili prej më shumë se pesë shekujsh ruan gjuhën, traditat dhe identitetin e tij, duke përfaqësuar një lidhje të veçantë historike mes Shqipërisë dhe Italisë.
Gjatë fjalës së tij, Presidenti Begaj vlerësoi marrëdhëniet historike dhe vëllazërore mes dy vendeve, duke e cilësuar komunitetin arbëresh si dëshmi të gjallë të kësaj miqësie.
“Miqësitë mes shteteve mund të ndërtohen nga interesat e përbashkëta, ndërsa vëllazëria lind nga historia, nga kujtesa, lind nga lidhjet njerëzore. Ju, të dashur arbëreshë, jeni themeli i kësaj vëllazërie”, u shpreh Begaj.
Kreu i Shtetit falënderoi Presidentin Mattarella për organizimin e takimit, duke e cilësuar atë një mik të madh të Shqipërisë dhe mbështetës të anëtarësimit të vendit në Bashkimin Evropian.
Begaj theksoi se Italia mbetet një aleate e besueshme, partnere strategjike dhe një nga mbështetëset më të vendosura të aspiratave evropiane të Shqipërisë.
Një pjesë të rëndësishme të fjalës së tij Presidenti ia kushtoi rolit të arbëreshëve dhe shqiptarëve që jetojnë në Itali, duke vlerësuar kontributin e tyre në forcimin e marrëdhënieve mes dy popujve.
Ai nënvizoi se ruajtja e identitetit kombëtar dhe integrimi në shoqërinë pritëse nuk e përjashtojnë njëra-tjetrën, por kontribuojnë në pasurimin dhe forcimin e saj.
“Sot, krahas komunitetit historik arbëresh, qëndron edhe komuniteti i ri i shqiptarëve, që prej dekadash jetojnë, studiojnë, punojnë dhe ndërtojnë të ardhmen e tyre në Itali. Ata janë bërë pjesë e rëndësishme e jetës ekonomike, shoqërore, akademike dhe kulturore italiane”, deklaroi Begaj.
Sipas tij, këto dy komunitete, megjithëse të ndara nga shekuj historie, bashkohen nga aftësia për t’u integruar dhe për të ruajtur lidhjen me origjinën.
Presidenti vlerësoi gjithashtu aleancën Shqipëri-Itali në kuadër të NATO-s dhe synimin që të dy vendet të jenë së bashku edhe në Bashkimin Evropian.
Në përfundim të fjalës, Begaj u bëri thirrje kryetarëve të komunave arbëreshe të vazhdojnë përpjekjet për ruajtjen dhe transmetimin e gjuhës, riteve, traditave dhe kulturës te brezat e rinj.
“Bëjini të rinjtë të dashurohen me këtë traditë!”, ishte mesazhi i Presidentit shqiptar.
Në fund të takimit, Presidenti Begaj dhe Presidenti Mattarella shkëmbyen dekorata në shenjë vlerësimi të ndërsjellë për kontributin në forcimin e vëllazërisë, miqësisë dhe aleancës strategjike mes Shqipërisë dhe Italisë.
