Heqja e taksës së qarkullimit prej 27 lekësh për litër naftë dhe benzinë, e parashikuar nga qeveria duke nisur nga 1 janari 2027, do të shoqërohet me një skemë të re tarifimi për automjetet që përdorin rrugët kombëtare.
Një projektligj i depozituar në Kuvend nga deputeti socialist Andi Qose parashikon vendosjen e vinjetës, një tarifë për përdorimin e rrjetit rrugor kombëtar, e cila do të paguhet nga pronarët e automjeteve.
Nisma synon ndryshimin e ligjit nr. 8308, datë 18 mars 1998, “Për transportet rrugore”, duke zhvendosur mënyrën e financimit të infrastrukturës rrugore nga taksimi i karburantit drejt pagesës së lidhur me automjetin.
Sipas projektligjit, vinjeta do të zbatohet për automjetet e lehta dhe autobusët, ndërsa deri më 31 dhjetor 2029 do të përfshijë edhe mjetet e rënda që transportojnë mallra.
Si do të paguhet vinjeta?
Për makinat e regjistruara në Shqipëri, tarifa vjetore e vinjetës parashikohet të përfshihet në taksën vjetore të automjeteve. Kjo do të thotë se pronarët e mjeteve do ta paguajnë atë së bashku me detyrimet e përvitshme.
Ndërkohë, automjetet me targa të huaja që hyjnë në Shqipëri do të duhet të blejnë vinjetën në pikat e kalimit kufitar ose nëpërmjet platformave elektronike.
Projektligji parashikon tarifa të ndryshme në varësi të kohëzgjatjes së përdorimit të rrugëve, duke filluar nga një ditë deri në 365 ditë.
Për vinjetën ditore, tavani i pagesës do të jetë deri në 9% të tarifës vjetore, për atë javore deri në 11%, ndërsa vinjeta 10-ditore deri në 12%.
Për vinjetën 30-ditore tarifa mund të arrijë deri në 19% të pagesës vjetore, ndërsa për atë 60-ditore deri në 30%.
Vlera konkrete në lekë e vinjetës mbetet për t’u përcaktuar nëpërmjet akteve përkatëse.
Kush do t’i mbledhë paratë dhe si do të kontrollohen makinat?
Sipas nismës, Drejtoria e Përgjithshme e Shërbimeve të Transportit Rrugor do të jetë përgjegjëse për emetimin e vinjetës, ndërsa shoqëria EKORR sh.a. do të merret me shpërndarjen dhe shitjen e saj.
Të dy institucionet do të mbajnë një pjesë të të ardhurave në formën e tarifës së agjentit, për mbulimin e kostove të funksionimit, ndërsa pjesa e mbetur do të derdhet në buxhetin e shtetit.
Kontrolli i pagesës do të kryhet përmes kamerave të Policisë së Shtetit që lexojnë targat e automjeteve dhe i verifikojnë ato në regjistrat elektronikë.
Për automjetet që qarkullojnë pa vinjetë të vlefshme parashikohet gjobë e barabartë me tarifën mujore të kategorisë përkatëse, krahas detyrimit për t’u pajisur me vinjetë.
Nga kjo skemë përjashtohen segmentet rrugore me koncesion ose PPP, si dhe urat dhe tunelet ku paguhet një tarifë e veçantë.
Qeveria do të ketë mundësi të përcaktojë reduktime ose përjashtime për automjetet elektrike, ato me hidrogjen, mjetet me emetime të ulëta dhe kategori të tjera.
Nisma vjen në një kohë kur paketa fiskale e vitit 2027 parashikon edhe ndryshime të rëndësishme në taksimin vjetor të automjeteve, përfshirë rritjen e detyrimeve për një pjesë të konsiderueshme të tyre.
Nëse projektligjet miratohen, drejtuesit e mjeteve do të përfitojnë nga heqja e taksës së qarkullimit në çmimin e karburantit, por do të përballen me një sistem të ri pagesash vjetore për automjetin dhe përdorimin e rrugëve kombëtare. /skyweb.al
