Shtatori 2025 ka shënuar një tjetër rekord për turizmin shqiptar. Sipas të dhënave zyrtare të INSTAT, numri i vizitorëve të akomoduar në vend është rritur me 31.7% krahasuar me të njëjtën periudhë të një viti më parë, duke konfirmuar trendin në rritje të sezonit turistik përtej muajve të verës.
Rritja më e fortë është regjistruar tek vizitorët e huaj, të cilët janë rritur me 37.8%, ndërsa vizitorët vendas janë rritur me 15.1%.
Edhe numri total i netë-qëndrimeve është rritur ndjeshëm me 19.6%. Turistët e huaj kanë qëndruar më gjatë në vend, duke shënuar një rritje prej 25.1% të netë-qëndrimeve, në krahasim me 4.8% nga vizitorët rezidentë.
Strukturat hoteliere kanë raportuar rritje të fortë. Hotelet dhe akomodimet e ngjashme shënuan një rritje prej 32.1%, ndërsa zonat bregdetare rezultuan më të preferuarat nga të huajt, me 44.1% rritje të fluksit.
Rajoni i qendrës kryeson për numër vizitorësh, me 161 mijë të akomoduar, i ndjekur nga jugu me 137 mijë, ndërsa veriu ka pritur rreth 106 mijë vizitorë. Të dhënat tregojnë se destinacionet urbane dhe bregdetare mbeten më të kërkuarat.
Sa i përket origjinës së turistëve, Kosova mbetet tregu kryesor me 13% të vizitorëve të huaj, e ndjekur nga Polonia (11%), Italia (10%), Gjermania (9%) dhe Franca (8%). Pjesa tjetër prej 49% vjen nga vende të tjera, duke konfirmuar zgjerimin e tregjeve të turizmit hyrës drejt Shqipërisë.
Një tregues i rëndësishëm është edhe shfrytëzimi i dhomave në hotele, që arriti në 52.7%, krahasuar me vetëm 40.4%një vit më parë.
Të dhënat konfirmojnë se Shqipëria po e zgjas sezonin turistik dhe po forcon pozicionin e saj si një destinacion konkurrues në Mesdhe, me rritje të qëndrueshme të vizitorëve edhe pas muajve të kulmit veror. /skyweb.al
