Sipas të dhënave më të fundit të Agjencisë Kombëtare të Punësimit dhe Aftësive (AKPA), aktualisht në të gjithë Shqipërinë janë të listuara 6,916 vende të lira pune. Vetëm në dy javët e para të tetorit janë raportuar 1,143 pozicione të reja, duke reflektuar një nevojë të shtuar për fuqi punëtore në disa sektorë kyç të ekonomisë.
Në zonat bregdetare, megjithëse sezoni turistik ka përfunduar, bizneset vijojnë të kërkojnë staf shërbimi si kamarierë, kuzhinierë, sanitarë dhe personel ndihmës. Nga ana tjetër, në qytetet e tjera të vendit, dominon kërkesa për punëtorë krahu, me 231 pozicione të raportuara vetëm në dy javët e para të muajit. Këta punëtorë janë të nevojshëm kryesisht në sektorët e ndërtimit, prodhimit dhe logjistikës.
Paralelisht, vazhdon të jetë e lartë edhe kërkesa për punonjës të kualifikuar me arsim të lartë. Janë shpallur 230 vende pune për profesionistë të fushave si financa, ekonomia, juridiku, inxhinieria dhe teknologjia. Kjo tregon një orientim në rritje të bizneseve drejt punësimit të stafit të specializuar, për të përmbushur kërkesat e zgjerimit apo rritjes së formalizimit të aktivitetit.
Të dhënat e AKPA-së tregojnë se tregu shqiptar i punës është dinamik dhe i ndikuar ndjeshëm nga sezonaliteti dhe zhvillimi rajonal, por përballet ende me një sfidë të theksuar: mungesën e kandidatëve të gatshëm për të pranuar pozicionet ekzistuese. /Skyweb.al
