Ndërsa numri i përgjithshëm i veprave penale të evidentuara në Shqipëri po shënon rënie, një kategori po ecën me shpejtësi në drejtim të kundërt: Krimet kibernetike.
Të dhënat e fundit të INSTAT tregojnë se gjatë vitit 2024 policia evidentoi 388 krime kibernetike, nga 276 raste një vit më parë. Kjo përfaqëson një rritje prej rreth 41% vetëm brenda një viti.
Por ndryshimi bëhet edhe më i fortë po të krahasohet me vitin 2022, kur ishin regjistruar vetëm 152 raste.
Në harkun e dy viteve, krimet kibernetike janë rritur me rreth 155%, duke u bërë më shumë se 2.5 herë më të shumta.
Rritja vjen në një kohë kur kriminaliteti i përgjithshëm ka ndjekur tendencë rënëse.
Në vitin 2024 u evidentuan gjithsej 32,653 vepra penale, 3.5% më pak se në vitin 2023 dhe 2.5% më pak se në 2022.
Pra, ndërsa forma tradicionale të kriminalitetit si vjedhjet dhe mashtrimet kanë shënuar rënie, një pjesë gjithnjë e më e madhe e aktivitetit kriminal po zhvendoset drejt hapësirës digjitale.
Edhe numri i personave të dyshuar për krime kibernetike është rritur ndjeshëm.
Në vitin 2024 rezultojnë 229 persona të dyshuar për këtë kategori, nga 129 në vitin 2023 dhe vetëm 46 në vitin 2022.
Kjo do të thotë se në vetëm dy vjet numri i personave të dyshuar për krime kibernetike është pothuajse pesëfishuar.
Të dhënat tregojnë një ndryshim të profilit të kriminalitetit në Shqipëri, ku teknologjia dhe përdorimi gjithnjë e më i madh i shërbimeve online po shoqërohen edhe me shtimin e veprave penale të kryera në mjedisin digjital./skyweb.al
