Familjet kujdestare profesionale që marrin në përkujdesje fëmijë pa kujdes prindëror do të përfitojnë një pagesë mujore të barasvlefshme me pagën minimale. Prindi aplikues do të lidhë kontratë pune me bashkinë ku ka vendbanimin e përhershëm.
Vendimi i miratuar nga qeveria përcakton pagesën për shërbimin e kujdestarisë profesionale, krahas mbështetjes financiare për nevojat e çdo fëmije të vendosur në familje.
Pagesa për shërbimin jepet një herë në muaj, pavarësisht numrit të fëmijëve që familja ka në kujdes. Kështu, edhe nëse kujdeset për dy fëmijë, familja përfiton një pagesë sa paga minimale.
Këtë pagesë mund ta marrë edhe prindi që është i punësuar, i vetëpunësuar ose ushtron një veprimtari tjetër profesionale. Ai duhet ta organizojë kohën në mënyrë që puna tjetër të mos cenojë nevojat, sigurinë dhe mirëqenien e fëmijës.
Veç pagesës profesionale, për çdo fëmijë të vendosur në kujdes alternativ parashikohen 12,000 lekë në muaj për nevojat e përditshme dhe 35,000 lekë në vit për shpenzime të tjera.
Për një vit të plotë kujdesi, mbështetja për nevojat e një fëmije arrin në 179,000 lekë. Kjo shumë është e veçantë nga pagesa për shërbimin që ofron familja kujdestare.
Familjet profesionale duhet të jenë të vlerësuara, të trajnuara dhe të miratuara për këtë shërbim. Ato strehojnë dhe përkujdesen për fëmijë që kanë nevojë për mbrojtje dhe nuk mund të qëndrojnë nën kujdesin e prindërve biologjikë.
Vendosja e fëmijës në familjen kujdestare ndiqet nga strukturat e mbrojtjes së fëmijës dhe realizohet sipas procedurave ligjore, me miratim gjyqësor dhe rregulla të posaçme për rastet emergjente.
Mbështetja mujore dhe vjetore për fëmijët do të indeksohet çdo vit sipas indeksit të çmimeve të konsumit. Fondet për këto pagesa do të mbulohen nga buxheti i shtetit dhe do t’u transferohen bashkive. /skyweb.al
