Sistemi evropian i alarmit të shpejtë për sigurinë ushqimore, RASFF, ka shpërndarë një njoftim sigurie lidhur me praninë e niveleve të larta të substancës Acrylamide në produktin e Prince Caffee me origjinë nga Kosova, i eksportuar nga Devolli Group.
Informacioni u raportua fillimisht nga autoritetet kroate dhe më pas u konfirmua zyrtarisht nga Agjencia e Ushqimit dhe Veterinarisë së Kosovës.
Sipas komunikatës zyrtare, alarmi me numër 2025.10458 lidhet me produktin “Caffe Monaco” 400 gram, kafe e bluar, për të cilën analizat kanë evidentuar përmbajtje të lartë të akrilamides, një përbërës kimik i konsideruar potencialisht i dëmshëm për shëndetin.
Autoritetet kosovare kanë bërë me dije se janë në proces zbatimi të procedurave ligjore, në koordinim me institucionet përkatëse vendore dhe ndërkombëtare. Megjithatë, deri më tani nuk është sqaruar nëse produkti është tërhequr nga tregu, nëse bëhet fjalë për një lot të caktuar prodhimi apo nëse janë kryer kontrolle shtesë në pikat e shitjes.
Kjo mungesë transparence ka ngritur pikëpyetje mbi nivelin e informimit të konsumatorëve.
Në këtë kontekst, vëmendja shtrihet edhe në Shqipëri, ku pritet një reagim zyrtar nga Autoriteti Kombëtar i Ushqimit, për të konfirmuar nëse produkti gjendet në tregun vendas dhe çfarë masash do të merren për garantimin e sigurisë ushqimore.
Çfarë është akrilamida dhe pse konsiderohet e rrezikshme
Akrilamida është një substancë kimike që formohet gjatë përpunimit termik në temperatura të larta, veçanërisht në ushqime me përmbajtje të lartë niseshteje.
Ajo krijohet gjatë procesit të pjekjes ose skuqjes dhe është e pranishme në produkte si kafeja, patatet e skuqura, biskotat, pica dhe ushqime të tjera të përpunuara termikisht.
Që prej vitit 1994, Agjencia Ndërkombëtare për Kërkime mbi Kancerin e ka klasifikuar akrilamiden si substancë potencialisht kancerogjene për njerëzit.
Studime të ndryshme shkencore sugjerojnë se ekspozimi afatgjatë ndaj saj mund të lidhet jo vetëm me rritjen e rrezikut për disa lloje kanceri, por edhe me dëmtime të sistemit nervor.
Një analizë e gjerë shkencore e publikuar në vitin 2022 në revistën “Frontiers in Nutrition”, e bazuar në të dhënat e mbi një milion personave, ka evidentuar një lidhje mes konsumit të vazhdueshëm të akrilamides dhe rritjes së rrezikut për kancer të zgavrës orale, stomakut, ezofagut, prostatës, pankreasit dhe tiroides.
Organizata evropiane Safe Food Advocacy Europe ka kërkuar në mënyrë të përsëritur masa më të forta rregullatore dhe informim më të qartë të publikut për rreziqet që lidhen me këtë përbërës.
Ndërkohë, konsumatorët në rajon mbeten në pritje të sqarimeve të plota dhe veprimeve konkrete nga autoritetet përgjegjëse, për të garantuar që produktet ushqimore që qarkullojnë në treg përmbushin standardet e sigurisë së Bashkimit Evropian. /skyweb.al
