Biznesmeni Behgjet Pacolli ka qëndruar për rreth shtatë orë në ambientet e Prokurorisë së Posaçme (SPAK), ku është paraqitur në lidhje me padinë për çështjen e Aeroportit Ndërkombëtar të Vlorës.
Pas daljes nga institucioni, Pacolli deklaroi se kishte bërë një kallëzim penal për atë që i cilësoi si padrejtësi të lidhura me aeroportin.
“Unë vetëm kam bërë një denoncim penal për padrejtësitë që janë bërë deri tani në lidhje me Aeroportin e Vlorës”, u shpreh ai para mediave.
Përmes një postimi në rrjetet sociale, biznesmeni dha më shumë detaje mbi dëshminë e tij, duke bërë të ditur se gjatë qëndrimit në SPAK kishte paraqitur fakte, dokumente dhe rrethana që, sipas tij, lidhen me zhvillimet rreth aeroportit.
Pacolli pretendon se janë kryer ndërhyrje të paligjshme në strukturën e pronësisë, se janë shpërfillur vendimet gjyqësore dhe se është cenuar prona private.
Ai shprehu besimin se institucionet e drejtësisë do të veprojnë në mënyrë të pavarur dhe do të garantojnë zbatimin e ligjit.
“Ne do të vazhdojmë të bashkëpunojmë plotësisht me SPAK dhe me çdo institucion kompetent, deri në sqarimin e plotë të së vërtetës dhe mbrojtjen e të drejtave tona ligjore. Askush nuk është mbi ligjin. Prona private dhe vendimet e gjykatave duhet të respektohen”, shkroi Pacolli.
Biznesmeni shtoi se nuk e ka humbur shpresën për vendosjen e drejtësisë në Shqipëri, duke theksuar se pret që çështja të zbardhet plotësisht nga institucionet përgjegjëse.
