Inteligjenca artificiale do të përdoret për të kontrolluar leximin e matësve të energjisë elektrike, me synimin për të reduktuar gabimet në regjistrimin e konsumit, për të identifikuar anomalitë dhe për të rritur saktësinë e të dhënave që përdoren për faturimin e abonentëve.
OSHEE Group ka planifikuar zhvillimin e funksionaliteteve të reja në Platformën e Matjes. Projekti synon modernizimin e sistemit që administron procesin e leximit të matësve në terren.
Një nga risitë kryesore është përdorimi i inteligjencës artificiale dhe teknologjisë OCR për identifikimin automatik të numrave që shfaqen në matësit e energjisë. Gjatë procesit të leximit, punonjësit do të fotografojnë matësin, ndërsa sistemi do të krahasojë indeksin e identifikuar në fotografi me vlerën e regjistruar manualisht. Në rast mospërputhjeje, leximi do të evidentohet për verifikim të mëtejshëm.
Një tjetër mekanizëm kontrolli lidhet me përdorimin e koordinatave GPS. Platforma do të regjistrojë vendndodhjen, datën dhe orën e leximit, duke mundësuar identifikimin e rasteve kur të dhënat regjistrohen jashtë zonës së përcaktuar për punonjësin. Gjithashtu, sistemi do të ruajë gjurmueshmërinë e pajisjes mobile të përdorur gjatë procesit.
Kontrollet automatike do të shtrihen edhe te historiku i konsumit. Leximet që rezultojnë jashtë parametrave të përcaktuar, edhe kur përputhen me fotografinë e matësit, do të klasifikohen si anomali dhe do t’i nënshtrohen procedurave përkatëse të verifikimit.
Modernizimi do të përfshijë edhe mekanizma analitikë për identifikimin e rasteve që mund të lidhen me humbjet teknike dhe joteknike të energjisë, si dhe përmirësimin e monitorimit të procesit të leximit.
Qëllimi është rritja e transparencës, reduktimi i gabimeve njerëzore dhe kufizimi i mundësive për abuzime gjatë regjistrimit të konsumit. Projekti nuk parashikon zëvendësimin e leximit në terren me matës inteligjentë, por forcimin e kontrollit digjital mbi këtë proces. /scan.tv
