Ministrja e Ekonomisë, Delina Ibrahimaj, deklaroi se për Zvërnecin ende nuk ka një projekt të miratuar, ndërsa tha se po punohet nga arkitektë dhe ekspertë të mjedisit për hartimin e tij.
Gjatë konferencës për mediat, Ibrahimaj u shpreh se projekti duhet të përmbushë standardet e Bashkimit Evropian për mbrojtjen e mjedisit, duke e lidhur atë me atë që qeveria e cilëson si investimin më të madh në turizëm.
“Ende nuk kemi një projekt për Zvërnecin. Po punohet nga arkitektë dhe ekspertë të mjedisit për të hartuar një projekt që do të përmbushë standardet e BE-së për sa i përket mbrojtjes së mjedisit dhe që do të bëjë të mundur realizimin e investimit më të madh që kemi pasur në turizëm, në nivelin e 4 miliardë eurove”, tha Ibrahimaj.
Sipas ministres, për një ekonomi me prodhim të përgjithshëm rreth 27 miliardë euro, një investim prej 4 miliardë eurosh do të përbënte një nxitje të madhe për ekonominë vendase.
Ibrahimaj foli edhe për zhvillimin e zonës së Sazanit, duke deklaruar se ishulli do të mbetet në pronësi të shtetit shqiptar.
Ajo tha se në këtë projekt shteti shqiptar do të përfshihet si bashkëinvestitor dhe bashkëpronar, ndërsa aktualisht po negociohet me kompaninë për përqindjen që do të ketë pala shqiptare.
“Kemi filluar punën për të bërë disa veprime lidhur me zhvillimin e zonës së Sazanit. Është një ishull që do të mbetet në pronësi të shtetit shqiptar. Në atë projekt, shteti shqiptar do të përfshihet si bashkëinvestitor dhe bashkëpronar”, deklaroi ministrja.
Ajo shtoi se gjithçka do të bëhet transparente sapo të ketë një pasqyrë më të qartë mbi negociatat.
Ministrja njoftoi gjithashtu se brenda verës qeveria do të nisë konsultimin publik për ligjin e ri të investimeve, i cili do të përshtatet me rregullat dhe standardet e Bashkimit Evropian.
Ligji aktual për investimet strategjike është miratuar në vitin 2015 me afat 3-vjeçar, por pas disa shtyrjeve, afati i tij përfundon në dhjetor të këtij viti.
“Kemi marrë përsipër që brenda këtij viti të miratojmë ligjin e ri për investimet. Brenda verës do të fillojmë një proces konsultimi për ligjin e ri për investimet, sipas standardeve të BE-së, si dhe për tërheqjen e investimeve në zonat e disavantazhuara”, tha Ibrahimaj.
