Ministrja e Ekonomisë Delina Ibrahimaj, deklaroi se qeveria nuk vlerëson se rritja aktuale e çmimeve është në nivele të papërballueshme për qytetarët.
Gjatë një konference për shtyp, Ibrahimaj tha se inflacioni aktual është në nivelin 3% dhe se, për momentin, nuk konsiderohet se ekonomia ndodhet në kushtet e një krize çmimesh që kërkon ndërhyrje të menjëhershme shtesë.
“Sot inflacioni është në nivelin 3% dhe nuk gjykohet se jemi në kushtet kur rritja e çmimeve është e papërballueshme”, u shpreh ministrja.
Ajo bëri me dije se indeksimi i pensioneve nuk do të kryhet më në muajin tetor, por në korrik.
Megjithatë, Ibrahimaj tha se qeveria do të marrë masa të reja mbështetëse nëse treguesit ekonomikë do të sinjalizojnë një rritje më të fortë të çmimeve.
Sipas saj, në rast se çmimet rriten përtej mundësive të pensionistëve dhe shtresave në nevojë, qeveria do të ndërhyjë për t’i mbështetur.
“Kur të vlerësojmë se ka një rritje të çmimeve përtej asaj që mund të përballojnë pensionistët ose shtresat në nevojë, ne do të jemi aty për të marrë masat e nevojshme”, deklaroi Ibrahimaj.
Ministrja e cilësoi situatën ekonomike të qëndrueshme, duke shtuar se rritja ekonomike është mbi pritshmëritë.
