Shqipëria renditet e dyta në Evropë për rënien e parashikuar të popullsisë deri në vitin 2100, pas Ukrainës, sipas projeksioneve demografike të publikuara nga Eurostat. Popullsia e vendit tonë pritet të tkurret me rreth 57%, ndërsa në Ukrainë rënia parashikohet të jetë 61.5%.
Sipas projeksioneve të Organizatës së Kombeve të Bashkuara, popullsia e Shqipërisë pritet të zbresë nga rreth 2.8 milionë banorë në vitin 2024, në afërsisht 1.2 milionë në vitin 2100. Kjo përfaqëson një tkurrje prej rreth 57%, ose më shumë se gjysmën e popullsisë.
Pas Shqipërisë në këtë renditje vjen Bosnjë-Hercegovina, me një rënie të parashikuar prej 56%, ndërsa Maqedonia e Veriut dhe Bjellorusia pasojnë me përkatësisht 52% dhe 51%.
Në rastin e Ukrainës, parashikimi për rënien e popullsisë prej 61.5% lidhet edhe me pasojat e luftës me Rusinë, pushtimin e një pjese të territorit dhe zhvendosjen e miliona banorëve.
Tkurrja demografike në Shqipëri ka nisur shumë më herët krahasuar me prirjen e përgjithshme të kontinentit. Sipas të dhënave të OKB-së, popullsia e Evropës arriti kulmin në vitin 2020, me rreth 749.2 milionë banorë.
Deri në vitin 2100, popullsia e Evropës parashikohet të zbresë në rreth 592.3 milionë banorë, rreth 21% më pak krahasuar me nivelin maksimal të regjistruar në vitin 2020.
Krahasimi tregon se rënia e parashikuar për Shqipërinë është shumë më e thellë se ajo e kontinentit në tërësi. Ndërsa Evropa pritet të humbasë rreth një të pestën e popullsisë së saj, Shqipëria mund të humbasë më shumë se gjysmën e banorëve deri në fund të këtij shekulli. /skyweb.al
