Ndërsa qeveritë evropiane shtojnë investimet në mbrojtje dhe përforcojnë kapacitetet ushtarake përballë një mjedisi gjithnjë e më të pasigurt, ekspertët paralajmërojnë se një tjetër front kërkon vëmendje të veçantë: sektori shëndetësor.
Një konflikt i gjerë ushtarak mund të përballë sistemet shëndetësore me presion të paprecedentë, për shkak të sulmeve me raketa dhe dronë, viktimave masive, si dhe kërcënimeve kimike, biologjike dhe radiologjike.
Në këtë kontekst, përgatitja e spitaleve dhe e personelit mjekësor po shihet gjithnjë e më shumë si pjesë e sigurisë kombëtare.
Gjeneral brigade Petter Iversen, Kirurg i Përgjithshëm i Norvegjisë dhe kryetar i Komitetit të Shefave të Shërbimeve Mjekësore Ushtarake të NATO-s, thekson se qëndrueshmëria e shoqërisë lidhet drejtpërdrejt me aftësinë e saj për t’u përballur me krizat.
“Një shoqëri e shëndetshme është një shoqëri rezistente. Nëse je rezistent, mund t’i përballosh presionet nga kundërshtarët”, deklaroi Iversen për Euronews.
Sipas tij, përgatitja nuk duhet të kufizohet vetëm te trajtimi i të plagosurve gjatë një sulmi. Ajo duhet të përfshijë garantimin e furnizimit me medikamente dhe pajisje mjekësore, funksionimin e spitaleve në kushte emergjence dhe aftësimin e personelit shëndetësor për të përballuar disa kriza njëkohësisht.
Inteligjenca artificiale dhe kërcënimet biologjike
Një tjetër shqetësim në rritje lidhet me zhvillimin e shpejtë të inteligjencës artificiale dhe mundësinë e përdorimit të saj në fushën e bioteknologjisë.
Ndërsa kjo teknologji mund të përshpejtojë kërkimin shkencor dhe zhvillimin e barnave të reja, ajo ngre gjithashtu shqetësime për keqpërdorimin e saj në krijimin e agjentëve biologjikë të rrezikshëm.
Laurent Muschel, drejtor dhe zëvendësshef i Autoritetit për Gatishmërinë dhe Reagimin ndaj Emergjencave Shëndetësore të Bashkimit Evropian (HERA), paralajmëron se natyra e kërcënimeve të ardhshme biologjike mund të jetë e vështirë të parashikohet.
“Ju nuk e dini se me çfarë po përballeni, sepse mund të jetë një virus i projektuar me ndihmën e inteligjencës artificiale ose një shtet që po zhvillon një virus të ri”, deklaroi Muschel për Euronews.com.
Ai nënvizoi se siguria biologjike do të jetë një nga prioritetet kryesore, duke theksuar nevojën për rregulla të përshtatshme dhe sisteme mbikëqyrjeje për përdorimin e inteligjencës artificiale.
Sipas tij, kjo teknologji përfaqëson një mundësi të rëndësishme për zhvillimin e mjekësisë, por njëkohësisht mund të krijojë rreziqe nëse bie në duart e aktorëve keqdashës.
Përballë këtyre sfidave, Evropa po përballet me nevojën për të zgjeruar konceptin e sigurisë, duke përfshirë jo vetëm mbrojtjen ushtarake, por edhe gatishmërinë e sistemeve shëndetësore për emergjenca të mëdha, kërcënime biologjike dhe kriza të shumëfishta. /skyweb.al
