Kryeministri Edi Rama është tërhequr nga propozimi për rritjen e tatimit mbi fitimin e biznesit të madh nga 15% në 17%, duke vendosur të ruajë normën aktuale, ndryshe nga sa ishte parashikuar në draftin fillestar të paketës fiskale 2027.
Ndryshimi u bë i ditur gjatë prezantimit të paketës së re fiskale, pas mbledhjes së qeverisë, ku Rama njoftoi një sërë masash që prekin bizneset, pagat, çmimet e ushqimeve, karburantet dhe pronat.
Sipas draftit të mëparshëm, të konsultuar nga Skyweb.al, rritja e tatimfitimit nga 15% në 17% pritej të sillte rreth 5 miliardë lekë të ardhura shtesë në vit për buxhetin e shtetit.
Por qeveria ka vendosur të mos e zbatojë këtë ndryshim, duke ruajtur normën 15% për kompanitë e mëdha.
“Nuk rrisim normën e tatimit të fitimit të sipërmarrjes, e cila mbetet 15%”, deklaroi Rama, duke theksuar se Shqipëria aplikon prej vitesh një nga normat më të larta të tatimfitimit në Ballkanin Perëndimor.
Megjithatë, tërheqja nga rritja e tatimfitimit nuk do të thotë se bizneset nuk do të përballen me taksa të tjera më të larta.
Qeveria ka vendosur të vijojë me propozimin për rritjen e tatimit mbi dividendin nga 8% në 15%, duke shtuar detyrimin mbi fitimet që kompanitë u shpërndajnë ortakëve dhe aksionarëve.
Sipas përllogaritjeve të draftit fillestar, kjo masë mund të sjellë rreth 3 miliardë lekë të ardhura shtesë në vit.
Një tjetër ndryshim i rëndësishëm është rritja e TVSH-së së përgjithshme nga 20% në 21%, ndërsa për 54 produkte të shportës ushqimore parashikohet ulja e saj në 6%.
Ndërkohë, pragu i regjistrimit të detyrueshëm në TVSH do të ulet nga 10 milionë në 5 milionë lekë qarkullim vjetor, duke përfshirë mijëra biznese të tjera në këtë skemë.
Për biznesin e vogël do të vijojë të zbatohet norma zero e tatimit mbi fitimin deri në fund të vitit 2029, sipas kushteve të përcaktuara në legjislacion.
Ndryshime janë njoftuar edhe për taksimin e pagave. Pragu mbi të cilin zbatohet norma 23% do të rritet nga 200 mijë në 300 mijë lekë bruto në muaj, ndërsa për pjesën e pagës mbi 700 mijë lekë Rama njoftoi një normë të re prej 30%.
Kjo e fundit përbën një tjetër ndryshim nga drafti fillestar, ku norma e propozuar për pagat më të larta ishte 32%.
Edhe në sektorin e turizmit ka një rishikim të propozimit fillestar. TVSH-ja për hotelerinë do të rritet nga 6% në 10%, por agroturizmi do të përjashtohet nga kjo rritje.
Rama njoftoi gjithashtu përgatitjen e një sistemi të ri taksimi për ekonominë digjitale, vendosjen e taksave më të larta për apartamentet e pabanuara, vilat në bregdet dhe makinat luksoze, si dhe krijimin e një strukture të specializuar për kontrollin e të ardhurave të individëve.
Një tjetër masë e rëndësishme është heqja e taksës së qarkullimit nga çmimi i naftës, që sipas kryeministrit do të sjellë ulje prej rreth 32 lekësh për litër në pompa, ndërsa detyrimi do të zhvendoset te automjetet.
Me ndryshimet e prezantuara, paketa fiskale 2027 rezulton ndryshe nga drafti fillestar, veçanërisht për tatimfitimin, normën maksimale të tatimit mbi pagat dhe trajtimin fiskal të agroturizmit.
Mbetet për t’u parë se si këto ndryshime do të pasqyrohen në tekstet përfundimtare të projektligjeve dhe cili do të jetë efekti i rishikuar i tyre në të ardhurat e buxhetit të shtetit.
