Prokuroria e Posaçme Kundër Korrupsionit dhe Krimit të Organizuar (SPAK) ka zhvilluar disa kontrolle në Tiranë dhe Vlorë në kuadër të hetimeve për një skemë të dyshuar të tjetërsimit të pronave në zonën e Zvërnecit.
Sipas informacioneve paraprake, kontrollet janë kryer me urdhër të SPAK-ut dhe lidhen me hetimin e një dosjeje që ka në fokus mënyrën e kalimit të pronave në këtë zonë bregdetare, e cila ka marrë vëmendje të madhe publike pas miratimit të projekteve për zhvillime turistike dhe ndërtimin e një resorti luksoz.
Mes personave që janë kontrolluar është edhe Pëllumb Petriti, ish-avokat i dënuar më herët për falsifikim dokumentesh pronësie në favor të një biznesmeni.
Kontrolle janë ushtruar gjithashtu edhe ndaj biznesmenit Redi Struga, raportoi News24.
SPAK po heton dyshimet për një skemë të gjerë të tjetërsimit të pronave në Zvërnec, një nga zonat më të diskutueshme vitet e fundit për shkak të interesit të lartë për investime turistike dhe konflikteve mbi pronësinë e tokave.
Deri tani nuk ka informacion zyrtar mbi rezultatet e kontrolleve apo personat që mund të jenë vënë nën hetim, ndërsa veprimet procedurale vijojnë.
Hetimet pritet të hedhin dritë mbi mënyrën se si janë përfituar dhe regjistruar një pjesë e pronave në këtë zonë, si dhe mbi përgjegjësitë e mundshme të personave të përfshirë në proces. /skyweb.al
