Shoqata Shqiptare e Turizmit (ATA) kundërshton projektvendimin e qeverisë për rritjen e Tatimit mbi Vlerën e Shtuar (TVSH) për shërbimet e akomodimit nga 6% në 10%, duke paralajmëruar pasoja për konkurueshmërinë e sektorit turistik dhe pozicionin e Shqipërisë përballë destinacioneve të tjera të rajonit.
Në një deklaratë publike, ATA shprehet se propozimi është ndërmarrë pa konsultime paraprake me grupet e interesit dhe pa një analizë të plotë të ndikimit ekonomik. Sipas shoqatës, masa vjen në një periudhë kur bizneset formale të turizmit po përballen me rritjen e kostove të operimit, shpenzimeve për personelin dhe çmimeve të lëndëve të para.
Shoqata argumenton se norma e reduktuar e TVSH-së ka ndihmuar në zhvillimin e turizmit shqiptar dhe në rritjen e numrit të vizitorëve ndër vite. Për këtë arsye, ajo paralajmëron se rritja e taksës mund të dobësojë konkurrueshmërinë e bizneseve vendase dhe të ndikojë negativisht në të ardhurat e sektorit.
Një nga shqetësimet kryesore të shoqatës lidhet me informalitetin në tregun e akomodimit. Sipas ATA-s, Strategjia e Turizmit 2026–2030 evidenton se 78% e kapaciteteve akomoduese në Shqipëri përbëhen nga apartamente me qira ditore, ndërsa vetëm 22% nga hotele.
Shoqata vlerëson se lufta kundër informalitetit dhe krijimi i kushteve për konkurrencë të ndershme duhet të jenë prioritet i qeverisë, në vend të rritjes së barrës fiskale për bizneset që operojnë në mënyrë të rregullt.
Në mbështetje të qëndrimit të saj, ATA i referohet edhe të dhënave për netët e qëndrimit të turistëve, duke i krahasuar ato me Malin e Zi dhe Kroacinë. Sipas shoqatës, këto diferenca ngrenë pikëpyetje mbi nivelin e formalizimit dhe raportimit të aktivitetit në sektorin shqiptar të akomodimit.
ATA i bën thirrje qeverisë të pezullojë projektvendimin për rritjen e TVSH-së nga 6% në 10% dhe të nisë një proces konsultimi me përfaqësuesit e industrisë së turizmit.
Shoqata kërkon gjithashtu që institucionet të përqendrohen në luftën kundër informalitetit, me synimin për të rritur të ardhurat buxhetore dhe për të garantuar konkurrencë të ndershme mes operatorëve.
Sipas ATA-s, rritja e TVSH-së rrezikon të dobësojë pozicionin e Shqipërisë në tregun rajonal dhe të ndikojë në një prej sektorëve kryesorë të ekonomisë së vendit.
Deri në marrjen e një vendimi përfundimtar, konsultimi me grupet e interesit dhe vlerësimi i ndikimit ekonomik të masës mbeten çështje kyçe për të ardhmen e sektorit të akomodimit.
