Qeveria propozon rritjen e TVSH-së për turizmin nga 6% në 10%, duke vënë në dyshim përfitimin që turistët kanë marrë nga lehtësimet fiskale të viteve të fundit.
Në dokumentin shpjegues të paketës fiskale argumentohet se ulja e taksës mund të jetë përthithur kryesisht nga bizneset si e ardhur shtesë, pa sjellë domosdoshmërisht një përfitim për pushuesit.
Me fjalë të thjeshta, trajtimi i favorshëm tatimor mund t’u ketë lënë më shumë para operatorëve turistikë, pa u përcjellë në të njëjtën masë te klientët përmes çmimeve më të ulëta. Ky është një nga argumentet me të cilat qeveria mbështet propozimin për të rritur normën e reduktuar të TVSH-së me katër pikë përqindjeje.
Ndryshimi prek shërbimin e akomodimit në strukturat turistike, shërbimet brenda hoteleve dhe resorteve me pesë yje me status special dhe markë ndërkombëtare, si dhe akomodimin e restorantin në agroturizmet e certifikuara, me përjashtim të pijeve.
Pra, propozimi për restorantet lidhet me kategoritë që përfitojnë aktualisht normën 6%, jo me të gjithë restorantet në vend.
Sipas dokumentit, të konsultuar nga skyweb.al, rishikimi mbështetet edhe te rekomandimet e misionit më të fundit të Fondit Monetar Ndërkombëtar. Analiza e cituar sugjeron se përfitimi fiskal mund të jetë përthithur kryesisht nga operatorët ekonomikë, pa krijuar domosdoshmërisht një nxitje të re për turistët. Dokumenti nuk e paraqet këtë si provë se çdo hotel apo agroturizëm ka rritur fitimet ose ka mbajtur të pandryshuara çmimet.
Qeveria argumenton gjithashtu se rritja e turizmit nuk mund t’i atribuohet vetëm TVSH-së së ulët. Sipas saj, zgjerimi i aktivitetit kishte nisur përpara zbatimit të lehtësimit dhe është ndikuar edhe nga përmirësimi i infrastrukturës dhe rritja e kërkesës turistike.
Pas masave mbështetëse të aplikuara prej vitit 2017, sektori vlerësohet se ka arritur një fazë zhvillimi që lejon rishikimin e trajtimit fiskal. Synimi i deklaruar është që buxheti të mbledhë më shumë të ardhura, ndërsa turizmi të ruajë një normë të reduktuar.
Rritja do të shtojë barrën e TVSH-së për shërbimet e përfshira. Nëse kjo kosto do të përballohet nga bizneset apo do t’u kalojë sërish klientëve përmes çmimeve, mbetet për t’u parë. /skyweb.al
