Rastet e drejtimit të lazerëve nga toka në drejtim të avionëve që ulen dhe ngrihen nga Aeroporti Ndërkombëtar i Prishtinës “Adem Jashari” janë shtuar së fundmi, duke ngritur shqetësime serioze për sigurinë ajrore.
Kontrollorët e trafikut ajror paralajmërojnë se rrezet e lazerit mund të shpërqendrojnë pilotët, t’u vështirësojnë shikimin dhe në raste të caktuara të shkaktojnë edhe verbim të përkohshëm.
Rreziku është veçanërisht i lartë gjatë ngritjes dhe aterrimit, faza kur ekuipazhi duhet të ketë përqendrim maksimal dhe çdo ndërhyrje mund të rrezikojë qindra pasagjerë në bord.
Sipas kontrollorëve, në disa prej rasteve dyshohet se lazerët janë përdorur nga të rinj ose adoleshentë, të cilët mund të mos jenë të vetëdijshëm për pasojat që mund të shkaktojnë.
Për rastet është angazhuar edhe Policia Kufitare, e cila po i trajton si veprime që mund të cenojnë drejtpërdrejt sigurinë e aviacionit.
Policia e Kosovës ka paralajmëruar se personat që drejtojnë lazerë ndaj avionëve mund të përballen me pasoja të rënda penale, përfshirë dënime me burgim nga një deri në dhjetë vjet.
Kontrollorët kanë bërë të ditur se objekt i lazerëve nuk kanë qenë vetëm avionët civilë, por edhe helikopterë të KFOR-it.
Në disa raste, sipas tyre, pjesëtarët e KFOR-it kanë arritur të identifikojnë personat e dyshuar dhe kanë ateruar pranë zonës ku ndodheshin, duke nisur më pas procedurat përkatëse. /skyweb.al
