Ministrja e Ekonomisë dhe Inovacionit, Delina Ibrahimaj, ka bërë të ditur se qeveria ka vendosur të ringrejë Bordin e Transparencës për monitorimin e çmimeve të karburanteve, në kushtet e rritjeve të fundit në treg.
Gjatë një interviste për Top Story ajo njoftoi gjithashtu uljen me 20 për qind të akcizës së naftës, nga niveli aktual prej 39.6 lekë për litër. Sipas saj, të dyja masat do të kalojnë me urgjencë për miratim në Këshillin e Ministrave.
Ministrja sqaroi se mekanizmi i përllogaritjes së çmimit do të mbetet i bazuar në bursën ndërkombëtare Platts, duke përfshirë taksat dhe një marzh të përcaktuar fitimi. Konkretisht, marzhi do të jetë 3 lekë për litër për shitjet me shumicë dhe 12 lekë për litër për shitjet me pakicë.
Sipas saj, këto çmime do të funksionojnë si tavan, mbi të cilin nuk do të lejohet tregtimi, ndërsa shkeljet do të shoqërohen me penalitete.
Ibrahimaj theksoi se që prej nisjes së konfliktit në Lindjen e Mesme, qeveria ka ngritur një taskforcë për monitorimin e tregut dhe se deri tani nuk janë evidentuar raste abuzimi nga kompanitë.
Ajo argumentoi se ndërsa çmimet në bursat ndërkombëtare janë rritur me rreth 80 për qind, në tregun vendas rritja ka qenë vetëm 24 për qind. Sipas ministres, marzhi i fitimit të kompanive vlerësohet në 8 deri në 9 për qind, një nivel që ajo e konsideroi të pranueshëm.
Ministrja bëri të ditur gjithashtu se po punohet për krijimin e një enti publik që do të merret me sigurimin e rezervave të detyrueshme të karburantit në vend.
