Danimarka po përgatit një nismë për ndalimin e pulave që rriten në mënyrë artificiale me ritme shumë të shpejta, të njohura si “pulat turbo”. Qeveria synon që kufizimi të zbatohet fillimisht në nivel kombëtar dhe më pas të shtrihet në të gjithë Bashkimin Europian, me argumentin se rritja e përshpejtuar cenon mirëqenien e kafshëve.
Sipas “The Guardian”, çështja u rikthye në qendër të debatit pas publikimit të një dokumentari nga televizioni danez TV2, i cili transmetoi pamje të regjistruara fshehurazi në një fermë shpendësh në veri të vendit. Në dokumentar pretendohej se fermeri Christian Tvergaard kishte shkelur rregullat për periudhën e errësirës që duhet t’u sigurohet pulave, duke kufizuar orët pa ndriçim për të nxitur ushqyerjen dhe rritjen e tyre. Fermeri pranoi gabimet dhe tha se kishte ndryshuar procedurat e punës.
Në fokus të debatit është raca Ross 308, e përdorur gjerësisht në prodhimin industrial të mishit të pulës. Këta shpendë arrijnë një peshë prej rreth dy kilogramësh në vetëm 33 ditë, ndërsa racave me rritje më të ngadaltë u nevojiten nga 46 deri në 63 ditë për të arritur të njëjtën peshë.
Sipas organizatave për mbrojtjen e kafshëve, kjo rritje e shpejtë mund të shkaktojë probleme me zhvillimin e kockave, organet dhe lëvizshmërinë e shpendëve.
Ministri danez për Natyrën dhe Mirëqenien e Kafshëve, Christian Rabjerg Madsen, deklaroi se qeveria do të punojë për ndalimin e këtyre racave në vend dhe do të kërkojë mbështetjen e shteteve të tjera europiane për një masë të përbashkët. Propozimi duhet t’i nënshtrohet ende shqyrtimit ligjor dhe ekonomik.
Nisma ka gjetur mbështetje në disa forca politike, por industria e shpendëve paralajmëron se një ndalim vetëm në Danimarkë mund të sjellë rritjen e importeve nga vende të tjera që përdorin të njëjtat raca, pa përmirësuar domosdoshmërisht kushtet e mirëqenies së kafshëve.
Organizatat për mbrojtjen e kafshëve kërkojnë kalimin drejt racave me rritje më të ngadaltë, të cilat do të rriteshin për rreth 56 ditë përpara se të arrinin peshën e tregut.
Debati pritet të ndikojë në diskutimet europiane për standardet e prodhimit të mishit, duke vënë përballë interesat e industrisë ushqimore dhe kërkesat për trajtim më të mirë të kafshëve. /skyweb.al
