Fushata kombëtare për kontrollin inteligjent të mjeteve në rrugë ka nisur zyrtarisht, me qëllim rritjen e sigurisë dhe forcimin e monitorimit të qarkullimit në akset me fluks më të lartë.
Drejtoria e Përgjithshme e Shërbimeve të Transportit Rrugor, në bashkëpunim me Policinë Rrugore dhe Task Forcën e Transportit Rrugor, e ka startuar këtë iniciativë pranë segmentit Tiranë Milot, një nga korridoret më të ngarkuara të vendit. Në nisjen e fushatës morën pjesë drejtori i përgjithshëm i DPSHTRR Kreshnik Bajraktari, drejtori i Policisë Rrugore Perlat Vatoci dhe drejtori i Task Forcës së Transportit Rrugor Ajet Zyberaj.
Kontrolli realizohet përmes përdorimit të teknologjisë së makinës inteligjente, e cila mundëson identifikimin në kohë reale të mjeteve në lëvizje dhe verifikimin e dokumentacionit të tyre sipas legjislacionit në fuqi.
Institucionet theksojnë se objektivat kryesore të fushatës janë rritja e sigurisë në rrugë, evidentimi i mjeteve me mangësi ligjore, garantimi i respektimit të kontrollit teknik dhe ndërgjegjësimi i drejtuesve për detyrimet që kanë gjatë qarkullimit.
Në fazat e ardhshme do të zbatohet një plan veprimi i posaçëm për identifikimin e mjeteve që nuk përmbushin kriteret ligjore për qarkullim, ndërsa aksioni do të shtrihet gradualisht në akset kryesore kombëtare.
Sipas institucioneve përgjegjëse, kjo nismë përfaqëson një hap drejt modernizimit të kontrollit rrugor dhe synon të ndikojë drejtpërdrejt në uljen e shkeljeve dhe rritjen e sigurisë për përdoruesit e rrugës. /SKYWEB.AL
