Drejtori i Përgjithshëm i Policisë së Shtetit, Skënder Hita, ka pezulluar nga detyra katër efektivë që përbënin zinxhirin përgjegjës të Komisariatit të Himarës gjatë periudhës kur në Qeparo u ndërtua një objekt pa leje me një kat nëntokë dhe katër kate mbi tokë.
Sipas Policisë, verifikimet paraprake kanë nxjerrë se ndërtimi në zonën e quajtur “Sugë” kishte nisur që në dhjetor 2025, ndërsa nga Komisariati i Himarës nuk ishin marrë masa as për ndalimin e punimeve dhe as për vënien përpara përgjegjësisë të personit që po ndërtonte.
Me urdhër të Hitës janë pezulluar ish-shefi i Komisariatit të Himarës, nënkomisar F. M., ish-shefi i Seksionit për Hetimin e Krimeve, komisar E. P., specialisti i hetimit të krimit K. P. dhe inspektori R. Ç., përgjegjës për zonën policore ku ndodhej objekti.
Disa prej tyre ndërkohë ishin transferuar në detyra të tjera në Vlorë dhe Divjakë, por pezullimi lidhet me përgjegjësitë që kanë pasur gjatë kohës kur objekti është ngritur.
Policia bën me dije se pronari i objektit është shtetasi L. B., banues në Laç, i cili kishte ndërtuar pa lejen e organeve kompetente.
Për të katër punonjësit është nisur edhe hetim disiplinor, ndërsa rasti po verifikohet për të përcaktuar përgjegjësinë e secilit për mosparandalimin e ndërtimit pa leje. /skyweb.al
