Përdorimi i zgjatur i rrjeteve sociale lidhet me më shumë stres, vetmi, trishtim dhe zemërim, por ndikimi në mirëqenien emocionale ndryshon sipas moshës dhe vendit.
Ky është një nga përfundimet e raportit të Gallup “State of the World’s Emotional Health 2026”, i publikuar në bashkëpunim me World Health Summit, i cili përfshin 97 vende, mes tyre edhe Shqipërinë.
Sipas studimit, përdoruesit që kalojnë të paktën dy orë në ditë në rrjetet sociale raportojnë më shumë emocione negative krahasuar me ata që i përdorin për 30 minuta deri në më pak se dy orë në ditë.
Të rinjtë e moshës 15–29 vjeç rezultojnë grupi që kalon më shumë kohë në këto platforma. Në nivel ndërkombëtar, 95% e tyre kishin përdorur rrjetet sociale gjatë shtatë ditëve të fundit.
Shqipëria është përfshirë në hartën e vendeve të analizuara për lidhjen mes kohës së kaluar në rrjete sociale dhe vlerësimit të jetës nga të rinjtë. Raporti evidenton se kjo marrëdhënie ndryshon ndjeshëm nga një vend në tjetrin.
Megjithatë, Gallup thekson se rezultatet tregojnë lidhje statistikore dhe nuk provojnë se përdorimi i rrjeteve sociale është shkaku i drejtpërdrejtë i përkeqësimit të mirëqenies emocionale. /skyweb.al
